Netflix’нинг глобал ҳитига айланган “Калмар ўйини” сериалининг 3-мавсум трейлери намойиш этилди. Бу сафар воқеалар янада кескин тус олиши кўрсатилмоқда. Севимли қаҳрамонларимиз яна ўйинга қайтади, аммо улар орасидан ҳеч бири тирик қолмаслиги эҳтимоли жуда юқори. Шунга қарамай, бу сериал учун энг кучли драматик якун бўлиши мумкин.
Иккинчи мавсум қандай якунланганди?
2-мавсум ўйинчилар ўртасида исён бошланган паллада якун топганди. Ки Хун ва унинг сафдошлари қўриқчилардан қурол олиб, бошқарув хонасига киришга уринган, бироқ Фронт Ман уларни тўхтатишга муваффақ бўлган эди. Учинчи мавсумда эса Ки Хун, Ҳьюн Жу, Даэ Ҳо Ёнг Сик, Геум Жа ва Мюнг Ги каби омон қолганлар ўйинга яна қайтади. Аммо бу сафар ўйин қоидалари ўзгарган бўлиши мумкин.
Янги ҳаёт: чақалоқ овози ва янги бурилиш
Трейлер охирида эшитилган чақалоқ йиғиси кўплаб мухлислар эътиборини тортди. Бу эҳтимол Жун Хи исмли 222-ўйинчининг фарзанди дунёга келганидан дарак беради. Сериал давомида ҳомиладор аёллар ҳам ўйинга жалб қилинганига гувоҳ бўлганмиз. 2-мавсум охиридаги қўзғолондан кейин 3-мавсумда ўйиндан чиқиш учун овоз бериш имконияти бекор қилиниши мумкин, демак Жун Хи ҳам иштирокда давом этишга мажбур бўлади. Бу эса бир қанча саволларни туғдиради: бошқа ўйинчилар катта пул мукофоти учун курашни давом эттирадими ёки чақалоқ ҳаёти учун жонини қурбон қиладими?
Янги мавсумда инсонийлик имтиҳони
“Калмар ўйини” кўп ҳолларда одамларнинг пулни ҳаётдан устун қўйишини кўрсатган. Аммо янги мавсумда ўйинчилар ўз манфаатидан воз кечиб, чақалоқ ва унинг онасини қутқаришга ҳаракат қилса, бу сериал ғоясининг энг олий чўққисига айланади. 1-мавсумда О Ил Нам инсониятга ишонмаслигини айтган ва Ки Хун билан одамлар бошқаларга ёрдам бермаслигига оид гаров боғлаган эди. Агар бу сафар ўйинчилар инсонийликни танласа, Ил Намнинг фалсафаси буткул рад этилади.
Ҳалокатли якун — аммо мукаммал рамзий хулоса
Агар Ки Хун ва унинг шериклари ўз ҳаётини хавф остига қўйиб, она ва унинг чақалоғи учун курашса, бу сериал бош ғоясининг мукаммал якунланиши бўлади. Севимли қаҳрамонларимиз ҳалок бўлса ҳам, бу инсонийлик ва меҳр-муҳаббатнинг ғалабасини англатади.
“Калмар ўйини” 3-мавсуми 2025 йил 27 июнда Netflix платформасида намойиш этилади.