Ижтимоий тармоқларда Тошкент вилояти Ангрен шаҳрида жойлашган «Қорабоғсой» кўприги қулаб тушгани айтилган видеомурожаат тарқалди. Автомобиль йўллари қўмитаси ҳолатга аниқлик киритди.
Унга кўра, 13 май куни тахминан соат 20:00 да А-373 «Тошкент-Оҳангарон-Ангрен-Қўқон-Шаҳрихон-Андижон» автомобиль йўлининг 85-километридаги «Қорабоғсой» кўприги четидаги охирги оралиқ қурилмаси, яъни пиёдалар йўлаги синган ва қулаб тушган. Бунинг оқибатида ушбу йўналиш бўйича автомобиллар ҳаракати вақтинча чекланиб, ҳаракатланиш D-019 «Ангрен шаҳрини айланиб ўтиш» автойўлига ўтказилган.
Хабарда айтилишича, ушбу кўприк 1969 йилда қуриб фойдаланишга топширилган, 1995 йилда реконструкция қилинган. «Ўзйўлкўприк» кластери кўприкда ўрганиш амалга ошириб, тегишли хулоса тақдим этган.
Хусусан, кўприк конструкцияси техник ҳолати ўрганилганда оралиқ қурилма тўсинларининг «маънавий эскиргани» аниқланган. Яъни тўсинлар амалдаги юкламаларни кўтара олмаслиги, кўприк устки қопламаси қалинлиги меъёридан ортиб, тўсинларга ортиқча юк бераётгани маълум бўлган.
Бундан ташқари, тўсинлар ўзаро яхлит бўлмай, алоҳида элемент сифатида ишлайди, кўприк устки қопламасидаги ёриқлардан ва қатнов қисми қопламасининг чекка қисмларидан оқиб тушган сувлар тўсинларнинг бутун танаси бўйлаб тарқалиб, ишчи арматураларни ҳам коррозияга учратмоқда, қайд этди Автойўлқўмита хулосага таяниб.
«Кўприкнинг умумий техник ҳолати қониқарсиз ҳолатда дея баҳоланади ва келгусида содир бўлиши мумкин бўлган авария ҳолатларининг олдини олиш мақсадида кўприкда тўлиқ реконструкция ишларини олиб бориш лозим», — дейилади хабарда.
Кўприк жойлашган автойўл I тоифага тўғри келиши (кўприк II тоифали автомобиль йўлига мўлжаллаб қурилган), кўприк габарити йўлга мос эмаслиги, айнан шу кўприк жойлашган оралиқда тирбандликлар ҳосил бўлаётганини инобатга олиб, кўприк реконструкция ишлари доирасида автомобиль йўли тоифасига ва замонавий меъёрий талабларга мос бўлган янги кўприкни қуриш мақсадга мувофиқлиги айтиб ўтилган.