2025 йилнинг биринчи чорагида Литва мавсумий ишлаш учун рухсатномаларни энг кўп Ўзбекистон фуқароларига тақдим этди. Бу Литва Ижтимоий таъминот ва меҳнат вазирлиги ҳузуридаги бандлик хизмати маълумотларида акс этади.
Қайд этилишича, хизмат томонидан сўнгги 5 йил ичида энг кўп мавсумий рухсатномалар берилган (363 та). Бу ўтган йилнинг шу даврига (122) нисбатан 2,8 баробар кўпдир. Гувоҳномаларда эркакларнинг улуши 91 фоиз, аёлларники 9 фоиздир.
Таҳлил қилинаётган даврда 15 та давлатдан (ўтган йили 9 та давлатдан) келган хорижликларга мавсумий ишлаш учун рухсатномалар берилган. 2025 йилда мамлакатлар рўйхатига Грузия, Украина, Вьетнам, Филиппин, Кения, Миср ва Молдова қўшилди.
Энг кўп патентлар Ўзбекистон (42 фоиз), Тожикистон (34 фоиз), Қирғизистон (6 фоиз) фуқароларига берилган. Ўтган йили ҳам айнан шу даврда ушбу мамлакатлар фуқароларига энг кўп мавсумий меҳнат гувоҳномалари берилганди, дейилади хизмат хабарида.
«Литва меҳнат бозори бу ерга пул топиш мақсадида вақтинчалик ишлаш учун келган хорижликлар учун тобора кўпроқ очилмоқда. Мавсумий ишга келганларнинг ярмидан кўпи (53 фоизи) йўлларда ишловчи ходим сифатида иш топган, ўтган йили эса энг машҳур касб озиқ-овқат маҳсулотларини қайта ишловчи (80 фоиз) бўлганди», — дейилади хизмат хабарида.
Энг машҳур касблар орасида ошпазлар (14 фоиз), гўштни қайта ишловчилар (7 фоиз), қулупнай етиштирувчилар ва қурилиш ходимлари (ҳар бири 5 фоиздан) бор. Ўтган йилнинг шу даврида энг кўп рухсатномалар озиқ-овқат маҳсулотларини қайта ишловчилар — 80 фоизгача, полиз экинлари етиштирувчилар ва ошпазлар (ҳар бири 4 фоиздан), озиқ-овқат маҳсулотларини қадоқловчилар (3 фоиз) сифатида ишлаш ниятида бўлганларга берилган.
Мамлакатда 2025 йил 1 апрель ҳолатига кўра 137 та давлатдан келган 145,8 минг нафар хорижлик меҳнат қилмоқда. Бунда энг кўп ҳисса Украина (47,5 минг), Беларусь (47,3 минг), Ўзбекистон (9,1 минг) ва Тожикистон (6,5 минг) давлатларига тўғри келган.