Жорий йил 14 май куни Франциянинг жануби-шарқида жойлашган Барбен ҳайвонот боғида чақмоқ уриши оқибатида 13 киши тан жароҳати олди.
Ҳодиса маҳаллий вақт билан соат 15:00 атрофида Салон-де-Прованс шаҳри яқинидаги очиқ текислик ҳудудида содир бўлган. Чақмоқ тушиши натижасида ёнғин келиб чиққани қайд этилган.
Буш-дю-Рон департаменти қутқарув хизмати маълумотига кўра, ҳодиса жойига 46 нафар қутқарувчи етиб келган. Улар 15 кишини эвакуация қилган, шулардан 13 нафари жароҳатланган. Оғир аҳволда бўлган аёл — Германия фуқароси — касалхонага ётқизилган. Яна 12 киши, жумладан тўрт нафар бола тиббий ёрдамга муҳтож бўлиб, шифохонага етказилган.
Ҳайвонот боғи ҳудудидаги ҳайвонлар ва инфратузилмаларга зарар етмаган. Франция об-ҳаво хизмати бир неча ҳудудда момақалдироқ хавфи сабабли «сариқ» даражадаги огоҳлантириш эълон қилган.