19−20 май кунлари Тошкент шаҳрида Ўзбекистон ва Франция университетлари ҳамкорлигининг биринчи «Ўзбек-француз университети: истиқболлар ва ривожланиш» форуми бўлиб ўтди.
Университетни ташкил этиш бўйича ҳукуматлараро битим президент Шавкат Мирзиёевнинг март ойида Парижга давлат ташрифи чоғида имзоланганди.
Форум очилиши 1 сентябрга мўлжалланган университетни ташкил этиш, шунингдек, олий таълим, илмий тадқиқотлар ва инновациялар соҳасида мамлакатлар ўртасидаги стратегик шерикликни ривожлантириш йўлидаги муҳим қадам сифатида баҳоланди, деб хабар қилди Франция элчихонаси матбуот хизмати «Dunyouzbeklari.Com»га.
Форумни Франция Европа ва ташқи ишлар вазирлиги бош котиби Анн-Мари Декот ҳамда Ўзбекистон президентининг ёшлар, фан, таълим, соғлиқни сақлаш, маданият ва спорт масалалари бўйича маслаҳатчиси Одил Абдураҳмоновлар кириш сўзи билан очди.
20 кишилик француз делегацияси таркибида Пуатье университети ректори ва француз консорциуми раҳбари Виржини Лаваль, Гавр-Нормандия университети ректори Педро Лагес дос Сантос, Лион 2 университети илмий ишлар бўйича проректори Лидия Кудруа де Лилль ва Рен университети вакили Клер Ле Паж бор эди. Уларга Ўзбек-француз университетининг бўлажак дастурларида иштирок этувчи ўқитувчи ва тадқиқотчилар ҳамроҳлик қилди. Франция-Ўзбекистон халқаро савдо палатаси раиси Жоанна Голас ҳам иштирок этди.
Ўзбекистон томонидан консорциумга бирлашган ҳамкор университетларнинг кўплаб ректорлари, проректорлари ва ўқитувчилари иштирок этди.
Форумнинг мақсади биринчи ўқув дастурлари учун асос яратиш бўлди: 2025−2027 йиллар оралиғида чет тили сифатида француз тили магистратураси (FLE), математика ва физика бўйича тайёргарлик курслари ҳамда биоинформатика, қайта тикланадиган энергия, транспорт ва логистика бўйича магистратура босқичини босқичма-босқич йўлга қўйиш.
Анн-Мари Декот «Ўзбекистон 24» телеканалига берган интервьюсида шундай деди: «2025 йил Франция ва Ўзбекистон ўртасидаги муносабатлар учун муҳим йил бўлди. Биз 30 йилдан ортиқ ҳамкорлик қилиб келмоқдамиз. Бу жуда кенг ва узоқ муддатли ҳамкорлик. Бу йил биз ҳамкорлигимизни янада чуқурлаштирмоқчимиз. Ҳамкорлик стратегик хусусиятга эга бўлиб, мутлақо барча соҳаларни қамраб олади. Биз ҳамкорликни Ўзбек-француз университети каби аниқ лойиҳаларни амалга ошириш орқали ривожлантирмоқчимиз. Бундан ташқари, бизнинг хавфсизлик ва мудофаа, иқтисодий ва дипломатик ҳамда, албатта, маданият, санъат ва таълим соҳаларида ҳам лойиҳаларимиз бор».
Бош котиб таълим соҳасидаги ҳамкорликни «бутунлай стратегик» деб таърифлади, чунки у ҳар икки мамлакат келажаги — ёш авлодга тегишли. Янги университетнинг ташкил этилиши «нафақат ўзбек ёшлари, балки бу ерга келиб ўқиш имкониятига эга бўлган француз ёшлари учун ҳам қимматли тажриба бўлади, чунки тажриба алмашиш жуда муҳим», деди Анне-Мари Декот.
«Биз ҳам худди шундай муаммоларга дуч келяпмиз, шунинг учун биз француз ва ўзбек ёшларини имкон қадар ушбу муаммоларга самарали ечим топиш учун биргаликда ишлашга тайёрлашимиз керак», — дея қўшимча қилди у.
Франсия элчихонасининг хабар беришича, янги университет очилиш вақтида вақтинча Тошкент техника университетида жойлашган бўлади.