4 июндан бошлаб АҚШдан пўлат ва алюминий импортига 50 фоизга оширилган божхона тўловлари кучга киради.
Бу ҳақда АҚШ президенти Дональд Трамп Truth ижтимоий тармоғида маълум қилган.
Аввалроқ Трамп Пенсилванияда нутқ сўзлаб, пўлат импортига божхона тўловларини 25 фоиздан 50 фоизга оширишни маълум қилган эди. Унга кўра, божларнинг ошиши мамлакатга алюминий импортига ҳам таъсир қилади. Трампнинг сўзларига кўра, АҚШ маъмурияти “4 июнь, чоршанба кунидан бошлаб пўлат ва алюминийга бож тўловларини 25 фоиздан 50 фоизга оширмоқда”.
28 май куни АҚШ Федерал Савдо бўйича суди Америка раҳбарининг президентлик ваколатларини суиистеъмол қилганини баҳона қилиб, унинг импорт божлари жорий этиш тўғрисидаги қарорини амалга оширишни блоклади. Бироқ эртаси куни АҚШ Апелляция суди божхона тўловларини блоклаш ҳақидаги қарорни тўхтатиб қўйди.
Оқ уй матбуот котиби Керолин Левитт брифингда таъкидлаганидек, АҚШ маъмурияти бу ишни Олий судга топшириш ниятида.