Тошкент шаҳрида Туркия элчихонаси қошида мактаб қуриш учун ер майдони ажратилди. Бу бўйича 5 июнь куни пойтахт ҳокими Шавкат Умурзоқов тегишли қарорни имзолади.
Ҳужжатга кўра, Шайхонтоҳур тумани «Коҳота» МФЙда жойлашган 0,31 гектар ер майдони Мактабгача ва мактаб таълими вазирлигига доимий фойдаланиш учун берилади.
Қайд этилишича, лойиҳа президентнинг 2020 йил 4 мартдаги «Ўзбекистон Республикаси ва Туркия Республикаси ўртасидаги икки томонлама ҳамкорликни янада кенгайтириш ва мустаҳкамлаш чора-тадбирлари тўғрисида»ги қарори ижросини таъминлаш ҳамда ер ажратишнинг маъмурий регламентига мувофиқ амалга оширилмоқда.
Вазирликка барча зарур ҳужжатлар, жумладан, архитектура-режалаштириш топшириқлари расмийлаштирилишини таъминлаш топширилди. Муҳандислик тармоқларини кўчириш ёки муҳофаза зонасини сақлаб қолиш ишлари ўз маблағлари ҳисобидан бажарилиши керак.
Қарор ижросини назорат қилиш Тошкент шаҳри ҳокимининг биринчи ўринбосари Бахтиёр Раҳмонов зиммасига юклатилди.
Шу йилнинг февраль ойида Тошкент ҳокими Шавкат Умурзоқов ва Туркиянинг собиқ элчиси Олган Бекар пойтахт кўчаларидан бирига Туркиянинг биринчи президенти Мустафо Камол Отатурк номини бериш, турк мактабини кенгайтириш ва турк боғи барпо этиш масалаларини муҳокама қилганди. Аслида Отатурк кўчасини қайта тиклаш режалари 2022 йилда бошланганди.
Пойтахт марказида Отатурк кўчаси аллақачон мавжуд бўлган, унда «Демир» номли йирик турк супермаркети жойлашган эди. 2011 йилнинг баҳорида у ўша ердаги савдо мажмуаси номи билан Зарафшон дея атала бошланган.
