Ўзбекистон Давлат активларини бошқариш агентлиги Mobiuz (ООО Universal Mobile Systems МЧЖ) мобил оператори устав капиталидаги 100% давлат улушини хусусийлаштириш бўйича очиқ халқаро жараён бошланганини эълон қилди.
Rothschild & Co халқаро инвестиция банки транзакция учун етакчи стратегик ва молиявий маслаҳатчи сифатида жалб қилинди. KPMG vendor due diligenceхусусийлаштириш ва молиявий, солиқ ва ҳуқуқий экспертизалар ўтказиш бўйича молиявий консалтинг хизматларини тақдим этади. Deloitte халқаро компанияси Mobiuz’ни мустақил баҳолашни амалга оширади.
2024 йил охирига келиб Mobiuz 2,1 триллион сўм соф даромад олди. Умумий абонентлар сони 7,8 миллион кишини ташкил этди.
Давлат улушини сотиш танлов асосида амалга оширилади. Хусусийлаштириш маҳаллий ва халқаро миқёсда барча манфаатдор томонлар учун очиқ, дейилади хабарда.
Тендер жараёни уч босқичда ташкил этилади:
- қизиқиш билдириш;
- мажбуриятсиз таклифлар қабули;
- мажбуриятли таклифлар қабули.
Қизиқиш билдиришномалари 2025 йил 1 август соат 18:00 гача қабул қилинади.
Давлат улушига даъвогарлар бир қанча мезонларга кўра баҳоланади, жумладан, сотиб олиш учун молиявий ресурсларнинг етарлилиги, маъмурий, ҳакамлик ёки бошқа суд жараёнларининг йўқлиги.
Бундан ташқари, номзодлар, консорциум аъзолари, акциядорлар ва бошқа аффилланган иштирокчилар давлат корхоналари бўлмаслиги, халқаро санкциялар рўйхатига киритилмаган бўлиши ёки санкция рўйхатига киритилганлар билан боғланмаган бўлиши керак.
ДАБА жадвални ўзгартириш, келишувни рад этиш ёки музокараларни тушунтиришсиз тугатиш ҳуқуқини ўзида сақлаб қолади.
Universal Mobile Systems 2014 йилда Россиянинг МТС (50,01%) ва Радиоалоқа, радиоэшиттириш ва телевидение маркази (49,99%) ўртасида қўшма корхона сифатида, аввалроқ МТС’нинг шуъба корхонаси бўлган «Уздунробита» компаниясига тегишли бўлган инфратузилма асосида ташкил этилган эди.
2016 йилнинг августида МТС компаниядаги улушини РРТМга сотган. 2018 йил ноябрь ойидан бошлаб давлатга тегишли «Рақамли ишонч» Рақамли иқтисодиётни ривожлантиришни қўллаб-қувватлаш жамғармаси операторнинг 100% эгасига айланган. 2019 йил декабрь ойида UMS ребрендинг ўтказди ва ўз номини Mobiuz’га ўзгартирган.
2020 йилда Mobiuz’ни хусусийлаштиришга тайёрлаш режалари эълон қилинди. Орадан бир йил ўтиб, Mobiuz’ни 2023 йилнинг апрелигача хусусийлаштириш режалаштирилганди. Ушбу компаниядаги давлат улушини сотиш вазифаси президентнинг 2025 йил 21 апрелдаги қарорида ҳам белгиланган.