Словакия бош вазири Роберт Фицо Ўзбекистон билан иқтисодий ҳамкорликни чуқурлаштириш ва икки томонлама муносабатларга янги суръат бағишлаш истагини билдирди. Бу ҳақда у 9 июнь куни Тошкентда бош вазир Абдулла Арипов ҳам иштирок этган Ўзбекистон-Словакия бизнес форумида маълум қилди, деб хабар берди Gazeta мухбири.
«Бу Словакия бош вазирининг Ўзбекистонга биринчи расмий ташрифи, мен бу ташриф биз Словакия Республикаси ва Ўзбекистон Республикаси ўртасидаги ҳамкорлик ва мулоқотни чуқурлаштиришга интилаётган янгиланган бир даврда амалга ошаётганидан чин дилдан фахрланаман», — деди Роберт Фицо.
У президент Шавкат Мирзиёев ва Ўзбекистон ҳукуматига «самимий қабул ва ташрифни аъло даражада ташкил этгани» учун миннатдорлик билдирди. Бош вазирнинг сўзларига кўра, форум ўзаро ҳурмат, имкониятлар ва иқтисодий ҳамкорликка эътиборга асосланган стратегик шерикликка умумий садоқат рамзи ҳисобланади.
Фицо ушбу ташриф икки давлат ташқи ишлар вазирликлари ўртасидаги январь ойидаги маслаҳатлашувларни давом эттиришини ва президент Мирзиёевнинг Словакияга бўлажак ташрифига пойдевор қўйишини таъкидлади.
«Бугун биз Словакия ва Ўзбекистон ўртасида стратегик шерикликни йўлга қўйиш тўғрисидаги қўшма декларацияни имзоладик. Бу лаҳза икки томонлама муносабатларимизда янги давр — яқинроқ сиёсий мулоқот, кенгроқ иқтисодий ҳамкорлик, фаровонлик ва хавфсизликка умумий садоқат даври бошланишини кўрсатади», — деди Словакия ҳукумати раҳбари.
Унинг таъкидлашича, 2024 йилда ўзаро товар айирбошлаш ҳажми 72 миллион евродан ортиқни ташкил этган, Словакиядан экспорт ҳажми 55% ошган ва 67 миллион еврога етган.
«Бу илҳомлантиради, аммо бу фақат бошланиши. Бизнинг умумий мақсад — айланмани 100 миллион еврога етказиш ва мен бу эришса бўладиган ва барқарор эканига қатъий ишонаман», — деди у.
Тошкентдаги Словакия делегацияси таркибида сув хўжалиги, энергетика, инфратузилма, мудофаа, қишлоқ хўжалиги ва бошқа соҳаларда фаолият юритаётган 30 та компания вакиллари иштирок этмоқда. Бош вазир интеллектуал транспорт тизимлари, металлургия, атроф-муҳит мониторинги, барқарор қишлоқ хўжалиги, табиий офатларни олдини олиш тизимлари ва бошқа соҳалардаги лойиҳаларни тилга олди.
«Аллақачон амалга оширилаётган лойиҳалардан мисоллар келтираман: аэропортлар ва гидроэнергетикада метеорологик тизимларни модернизация қилиш, автомобиль ва темирйўл транспортида интеллектуал ечимларни амалга ошириш, жумладан, Словакия Экспорт банки кўмагида оғирлик комплексларини етказиб бериш, Ангрен шаҳрида иш ўринлари яратадиган ва технологиялар трансферини таъминлайдиган ферроқотишма ишлаб чиқаришга инвестициялар, шунингдек, аллақачон умидли натижалар кўрсатаётган шоли етиштириш ва тупроқни қайта тиклаш бўйича қишлоқ хўжалиги лойиҳалари», — деди у.
Роберт Фицонинг қўшимча қилишича, Словакия янги лойиҳаларни, жумладан, энергетика ва мудофаа саноатини экспортни қўллаб-қувватлаш, техник тажриба ва мослашувчан молиявий воситалар билан қўллаб-қувватлашга тайёр.
У меҳнат миграцияси масаласига ҳам тўхталиб ўтди:
«Иқтисодий шериклик нафақат товар ва капитал, балки одамларга ҳам боғлиқ. Ўзбекистон 2025 йилда хорижга 200 минггача меҳнат муҳожирини жўнатишни режалаштирмоқда — бу Словакиянинг малакали ва ишончли ишчи кучига бўлган манфаатларига мос келади».
2024 йилда Словакиянинг Тошкентдаги элчихонаси деярли 3000 та меҳнат визаси берган, бу аввалги йилга нисбатан уч баробар кўп. «Биз Ўзбекистон ҳукумати билан виза тартиб-таомилларини соддалаштириш, ҳуқуқий, ахлоқий ва ўзаро манфаатли меҳнат ҳаракатчанлигини таъминлаш бўйича ишлаяпмиз», — деди у.
Фицо Ўзбекистонни «минтақавий барқарорлик устуни ва геосиёсий аҳамияти ортиб бораётган минтақада Словакия учун табиий ҳамкор» деб атади ва унинг минтақавий хавфсизлик, сув ресурсларини бошқариш ва энергетика ривожланишига қўшган ҳиссасини қайд этди. У, шунингдек, Ўзбекистоннинг қўшнилари, шунингдек, Афғонистон билан муносабатларида ижобий динамика муҳимлигини таъкидлади.
Сўнггида у форум иштирокчиларига мурожаат қилди:
«Келинг, бу лаҳзадан фойдаланайлик. Қўйилган пойдеворни аниқ натижаларга айлантирайлик: кўпроқ савдо, кўпроқ сармоя, кўпроқ иш ўринлари ва кўпроқ инновациялар. Словакия Республикаси бизнес, тараққиёт ва дипломатия соҳасида Ўзбекистоннинг ишончли ва динамик ҳамкори бўлишга тайёр. Ушбу форумнинг очилиши йўлнинг охири эмас, балки стратегик ва ўзаро ҳамкорликнинг бошланиши бўлсин».
Аввалроқ хабар қилинганидек, Ўзбекистон ва Словакия ўзаро товар айирбошлаш ҳажмини ошириш ва қишлоқ хўжалиги, автомобиль бутловчи қисмларини маҳаллийлаштириш, туризм ва фармацевтика соҳаларида йирик қўшма лойиҳаларни йўлга қўйишга келишиб олди. Томонлар IT стартаплари учун қўшма корхона фондини яратиш ва уюшган миграцияни йўлга қўйиш устида иш олиб боради.