Олий Мажлис Қонунчилик палатасидаги «Миллий тикланиш» демократик партияси фракциясининг йиғилишида юқумли касалликларнинг Ўзбекистонга кириб келишини барвақт аниқлаш ва уларнинг тарқалишининг олдини олиш бўйича қонун лойиҳаси муҳокама қилинди.
Қайд этилишича, мазкур ҳужжат лойиҳаси инсон учун хавфли бўлган юқумли касалликларни олдини олиш мақсадида ишлаб чиқилган бўлиб, унда 90 кундан ортиқ муддатда чет элда бўлиб қайтган фуқароларни ҳамда меҳнат фаолиятини амалга ошириш учун мамлакатга келган хорижликларни тиббий кўрикдан ўтказиш назарда тутилмоқда.
Хусусан, узлуксиз 90 кун ва ундан ортиқ муддат давомида чет элда бўлиб қайтган 18 ёшдан 60 ёшгача бўлган Ўзбекистон фуқаролари, Ўзбекистон ҳудудида доимий яшайдиган чет эл фуқаролари ва фуқаролиги бўлмаган шахслар ҳамда меҳнат фаолиятини амалга ошириш учун республикага кириб келаётган чет эл фуқаролари ва фуқаролиги бўлмаган шахсларни мажбурий равишда ОИВ (одам иммун танқислиги вируси)га тиббий текширувдан ўтказиш белгиланмоқда.
Фракция маълумотларига кўра, 2024 йили хорижда бўлиб қайтган 1,7 млн фуқаронинг 434 минги, яъни 25 фоизи ихтиёрий ОИВ/ОИТС текширувидан ўтган ва уларнинг 1512 нафарида ушбу касаллик аниқланган. Қонунчиликда бу борада мажбурий тиббий кўрик бўлмагани учун аксарият фуқаролар текширувга келмаяпти.
Йиғилишда ташаббускорлар депутат Шерзод Қулматовнинг нима учун 90 кун белгиланаётгани масаласига изоҳ бераркан, бу юқумли касаллик инсон организмида 90 кундан сўнг ўзини намоён қилишини қайд этди. У шунингдек, чет элдан қайтган фуқаро агар ўзининг, оиласининг соғлигини ўйласа, тезда тиббий кўрикдан ўтиши лозимлигини билдирди.
Унинг сўзларига кўра, юқумли касалликлар тарқалишининг олдини олиш, аҳоли саломатлигини муҳофаза қилиш, меҳнат миграцияси жараёнларида ижтимоий хавфсизликни таъминлаш бўйича таъсирчан ҳуқуқий механизмларни шакллантиришга хизмат қилади.
Ўзбекистон фуқароларини ОИВга мажбурий тиббий кўрикдан ўтказиш давлат бюджети маблағлари ҳисобидан, чет эл фуқаролари учун эса уларнинг шахсий маблағлари ҳисобидан амалга оширилади.
Қонун лойиҳаси депутатлар томонидан қўллаб-қувватланди.