Исроил ҳарбий-ҳаво кучлари Эроннинг ҳарбий объектларига, жумладан, ядровий дастури билан боғлиқ объектларга зарба берди, деб хабар бермоқда ЦАХАЛ. Эронга қарши ҳаво операцияси бир неча кун давом этиши кутилмоқда, деб ёзди The Times of Israel.
Теҳрондаги турар жойларга бир нечта зарбалар берилгани маълум. Тахминларга кўра, уларда Ислом инқилоби қўриқчилари корпусининг амалдорлари ва зобитлари яшайди.
Теҳронда портлаш овозлари эшитилмоқда, деб хабар бермоқда Эроннинг Tasnim агентлиги. Бундан ташқари, Эрон пойтахтининг бир неча қисмида тутун кўтарилмоқда. Теҳрон аэропортида барча авиақатновлар бекор қилинган.
Исроил армияси версиясига кўра, Эронда бир неча кун ичида 15 та ядровий бомба яратиш учун етарли бойитилган уран мавжуд ва Исроил бу таҳдидга қарши чоралар кўриши керак.
Исроил бош вазири Биньямин Нетаньяҳу ўз телемурожаатида Эрон ядровий обектларига қарши «мисли кўрилмаган» ҳарбий операция бошланганини эълон қилди.
«Биз Исроил тарихидаги ҳал қилувчи палладамиз… Бир неча дақиқа олдин Исроил „Исёнкор шер“ операциясини бошлади — бу Эроннинг Исроилнинг омон қолишига таҳдидини тўхтатиш учун мақсадли ҳарбий операция», — деди у. «Бу операция қанча керак бўлса, шунча кун давом этади».
Унинг сўзларига кўра, Исроил ядровий бомба, баллистик ракета дастури ва Нантанз уран бойитиш заводи устида ишлаётган эронлик олимларни бир неча кун давом этадиган операцияда нишонга олган.
Эрон ҳозирча Исроилга жавоб зарбаси бергани йўқ.
Исроилда 13 июнга ўтар кечаси фавқулодда ҳолат эълон қилинди. Барча ўқув машғулотлари бекор қилинди, ҳаётий муҳим корхоналардан ташқари барча корхоналар ёпилди. Мамлакат ҳаво ҳудуди ёпиқ.
АҚШ давлат котиби Марко Рубио Исроилнинг Эронга берган зарбалари «бир томонлама» бўлгани ва АҚШ операцияда «иштирок этмаганини» айтди.
«Бизнинг Эронга берилган зарбаларга алоқамиз йўқ ва бизнинг энг устувор вазифамиз минтақадаги кучларимизни ҳимоя қилиш бўлиб қолади. Исроил бизга маълум қилдики, унинг фикрича, бу операция ўзини ҳимоя қилиш учун зарур эди… Эрон АҚШ ва америкалик хизматчиларнинг манфаатларига дахл қилмаслиги керак», — деди у Оқ уй эълон қилган хабарномада.
Бир кун аввал АҚШ Давлат департаменти минтақадаги америкаликлар учун огоҳлантириш эълон қилиб, уларни «эҳтиёткор бўлишга» чақирган эди. Бутун минтақадаги Америка элчихоналаридан асосий бўлмаган ходимлар эвакуация қилинган.