Кинорежиссёр Сарвар Каримов Gazeta`нинг «Кинотавсия» лойиҳаси доирасида июнь ойида тақдим этиладиган фильмлар ҳақида ҳикоя қилади. Мазкур материални қуйидаги ҳавола орқали видео кўринишида томоша қилиш мумкин:
«Нэчжа аждарҳолар қиролини мағлуб этди»
Ва ниҳоят кино тарихидаги энг кассабоп мультфильм — «Нэчжа аждарҳолар қиролини мағлуб этди» Ўзбекистон кинотеатрларига етиб келди. Мазкур мультфильм хитойлик киноижодкорлар томонидан яратилган бўлиб, бугунги кунгача биргина Хитойнинг ўзида нақд 2 млрд доллар ишлаб топди ва шу тариқа дунёнинг энг кассабоп мультфильми мақомига эга бўлди.
Айнан дунёдаги: чунки на Pixar, на Disney бирорта мультфильми билан 2 млрд пул тўплай олмаган. Статистикага қаралса, ҳар бешинчи хитойлик бу мультфильмни томоша қилиб улгурибди. Умумий касса тушумлари бўйича «Нэчжа» фақатгина «Аватар»нинг биринчи ва иккинчи қисмлари, «Қасоскорлар: финал» ҳамда «Титаник»никдан кейин бешинчи ўринда турибди.
Аммо мазкур картинанинг прокати ҳали тугагани йўқ. Эслатиб ўтамиз, мультфильм бюджети — 80 млн доллар.
Сюжетга кўра, бундан 35 аср муқаддам одамлар ва денгиз аждарҳолари қонли уруш остонасига келиб қолган бўлади. Ёш шаҳзода Нэчжа ва аждарҳолар вориси Ао Бин бахтсиз тасодиф туфайли ҳалок бўлиб, арвоҳга айланишади. Уларнинг оталари эса бунда бир-бирини айблаб, қасос урушини эълон қилади. Аммо аслида Нэчжа ва Ао Бин қалин дўст бўлган бўлади.
Улар ҳаётга қайтиш ва янги таналарга эга бўлиш йўлини билишади, аммо уруш исталган лаҳзада бошланиши мумкин. Шу боис урушнинг олдини олишга интилаётган дўстлар бир жисмоний қобиқни баҳам кўришга мажбур бўлади.
Аммо Улян исмли ёвуз афсунгар воқеаларни четдан кузатади, айёрлик билан урушни бошлаб, барча жангчиларни ўзининг сеҳрли дори-дармонлари учун қимматбаҳо манбага айлантиришни мақсад қилган бўлади.
Шу ўринда, мультфильм режиссёри Ян Юй ҳақида ҳам икки оғиз гапириб ўтсак. Юй 1980 йилда шифокорлар оиласида туғилган. Отасининг ўлимидан кейин у 6 йил онасининг нафақаси ҳисобига яшаган. Уйининг гаражида яшаб, емай, ичмай, шахсий компьютерида мультфильмлар яратган. 2008 йилда унинг қисқа метражли мультфильми фестивалларда бир-иккита мукофот ютади.
Орадан йиллар ўтиб — 2016 йилда у Beijing Enlight Pictures компаниясига Хитой афсоналари асосида «Нэчжа» мультфильмни яратиш ғояси билан келади. Мультфильмнинг биринчи ва иккинчи қисмлари омадли чиққач, продюсерлар унга 80 млн доллар бериб, учинчи қисм бўйича ҳаракатларни бошлашади.
Узунқулоқ гапларга қараганда, режиссёр фильм касса йиғимларидан 10 фоизини олиб қолиш бўйича келишувга эга. Яъни айни пайтда режиссёр 200 млн доллар атрофида пул ишлаган бўлиши мумкин. Мана буни ҳақиқий омад деса бўлади. Асосийси — орзуларга ишониш ва тинмай меҳнат қилиш.
«Бу мультфильмни, албатта, катта экранларда кўриш керак, иложи бўлса, оила даврасида. Биргина муаммо — унинг давомийлиги 2,5 соат экан. Болаларга бунча вақт кинотеатрда ўтириш бироз оғирлик қилиши мумкин», — дейди Сарвар Каримов.
«Балерина»
«Жон Уик» франшизаси мухлислари учун ажойиб янгилик — «Балерина» жангари фильми катта экранларга чиқмоқда. Бош ролда — латофатли актриса Ана де Армас. Сюжетга кўра, у профессионал балерина ва ёлланма қотил бўлиб, оиласини ўлдириб кетган муттаҳамлардан ўч олади. Менимча, яхши жангари фильм учун бундан ортиқ сюжет керак эмас. Шунингдек, Баба Яга — Киану Ривзни ҳам бу фильмда кўришимиз мумкин. Кинокартина режиссёри — болалигимиздаги энг севимли фэнтезилардан бири «Ўзга дунё / Другой мир» фильмларини ишлаган Лен Уайзман.
Ўзининг мураккаб трюклари ва жанговар хореографияси билан ном қозонган «Жон Уик» олами бизни бу сафар ҳам лол қолдиришига ишонамиз. Агар сизга ушбу франшиза ёқса, 3 қисмдан иборат бўлган «Континенталь» мини-сериали ҳамда «Уик бу — оғриқ» ҳужжатли фильмларини ҳам тавсия қиламиз.
«Формула 1»
Ўтган йили «Топ Ган: Мэверик» фильми билан қалбларимизни ларзага солган режиссёр Жозеф Косинскидан яна бир фильм — «Формула 1». Бош ролларда Брэд Питт ва Хавьер Бардем.
Сюжетга кўра, Брэд Питт 90-йилларда машҳур бўлган, аммо жиддий авариядан сўнг профессионал спортни тарк этган Сонни Хейс ролини ижро этади. Кунлардан бир кун йирик пойга жамоасининг раҳбари Рубен (Хавьер Бардем) унга мурожаат қилиб, истеъдодли, аммо ҳали ёш пойгачига устозлик қилишни ва шу тариқа катта спортга қайтиб, жамоага қўшилишни илтимос қилади.
«Брэд Питт ёмон кинода ўйнамаслигини ҳисобга олсак, „Формула 1“ катта экранда кўрилиши шарт бўлган фильм», — дейди Сарвар Каримов.
«Материалистка»
«Материалистка» севишганлар учун янги романтик комедия ҳисобланади. Абадий севги учбурчаги ҳақида ҳикоя қилувчи ушбу фильмда Дакота Жонсон, Крис Эванс ва Педро Паскаль бош ролларни ижро этган.
«Сёрфер»
Улкан истеъдод соҳиби Николас Кейджнинг мухлислари «Сёрфер» триллерини томоша қилиши мумкин. Фильм премьераси Канн фестивали доирасида бўлиб ўтди ва мухлислар ҳамда кинотанқидчилар томонидан илиқ кутиб олинди. Кўпчилик ҳаттоки бу Николас Кейджнинг сўнгги йиллардаги энг яхши роли эканини таъкидламоқда. Аммо биз Кейджнинг ҳамма роли бир-биридан зўр эканини биламиз.
Хоррор мухлислари учун эса июнь ойини ҳақиқий байрам дейиш мумкин. Сарвар Каримов бу ойда қуйидаги фильмларни томоша қилишни тавсия қилмоқда:
- Швециялик ижодкорлар томонидан яратилган «Синистер. Зулматдан чиқиб» фильми (Скотт Дерриксонга алоқаси йўқ);
- Индонезиялик ижодкорлар томонидан яратилган «Астрал. Лаънатланганлар ороли» фильми (Мартин Скорсезега алоқаси йўқ);
- Мексикалик ижодкорлардан «Заклятие. Демон внутри» фильми (Жеймс Ванга алоқаси йўқ);
- Таиландликлардан «Кальмар уйини: Қайта ишга тушириш» (оригинал номи «Exit») фильми. Бу фильмда ҳам худди Netflix ишлаган айни номдаги сериалда бўлгани каби блогерлар гуруҳи ўлим билан юзма-юз келади;
- Ва, албатта, йилнинг энг катта хоррор премьераси — «28 йил ўтиб» картинаси. Мазкур фильм 2002 йилда чиққан «28 кун ўтиб» ва 2007 йилда чиққан «28 ҳафта ўтиб» фильмларининг давомидир. Картина режиссёри — Дэнни Бойль («Харобадан чиққан миллионер», «Игнада», «127 соат»). Асосий ролда — Воландеморт образи орқали барчамизга таниш бўлган Райф Файнс. Сюжетга кўра, дунё даҳшатли вирус билан қопланган, одамлар эса зомбиларга қарши курашишга мажбур.