Испаниянинг “Барселона” клуби Клублар ўртасидаги Жаҳон чемпионатида иштирок этиш умидида FIFA’га расмий мурожаат билан чиқди. Каталонияликлар турнирдан четлатилган Мексиканинг “Леон” клуби ўрнини эгаллашни сўраган. Бу ҳақда Marca нашрига таяниб Championat хабар берди.
Бироқ, FIFA “Барселона” клубининг илтимосини рад этди. Сабаби, регламентга кўра, ҳар бир мамлакатдан фақат иккита жамоа иштирок этиши мумкин. Испаниядан эса “Реал Мадрид” ва “Атлетико Мадрид” турнирга йўл олган. “Кўк-анорранглилар”нинг ЕЧЛдаги сўнгги натижалари қимматга тушди, шу боис улар керакли рейтинг балларини қўлга кирита олмади.
“Леон” клубининг ўрнини эгаллаш учун саралаш учрашуви ташкил этилди ва унинг натижасига кўра АҚШнинг “Лос-Анжелес” клуби Жаҳон чемпионатида иштирок этиш ҳуқуқини қўлга киритди.
Эслатиб ўтамиз, “Леон” турнирдан четлатилган эди. Бунга сабаб — FIFA’нинг “бир эгаликда бир нечта клуб” бўлишига қарши қоидасидир. Мексиканинг “Пачука” клуби Жаҳон чемпионатида қатнашмоқда ва у ҳам худди “Леон” сингари “Групо Пачуcа” компаниясига тегишли. Шу боис, FIFA манфаатлар тўқнашувининг олдини олиш мақсадида “Леон”ни турнирдан четлатди.