АҚШ президенти Дональд Трамп маъмурияти яна 36 давлат фуқароларининг АҚШга киришини тақиқлаш ёки чеклаш масаласини кўриб чиқмоқда, дея хабар бермоқда Reuters Давлат департаменти ички ҳужжатларига таяниб.
«Давлат департаменти 60 кун ичида белгиланган мезон ва талабларга жавоб бермаса, киришини тўлиқ ёки қисман тўхтатиб қўйишни тавсия этиши мумкин бўлган безовта қилувчи 36 та давлатни аниқлади», — дейилади ҳужжатда.
Давлат департаменти рўйхатдаги давлатлар мос келмайдиган кўрсаткичларни санаб ўтди: ҳужжатларни расмийлаштириш билан боғлиқ муаммолар, паспортларнинг «шубҳали хавфсизлиги», ўз фуқароларини АҚШдан депортация қилишда ҳамкорлик қилишдан бош тортиш ва визанинг бузилиши.
Reuters маълумотларига кўра, рўйхатга Ангола, Антигуа ва Барбуда, Бенин, Бутан, Буркина Фасо, Кабо Верде, Камбоджа, Камерун, Кот д’Ивуар, Конго Демократик Республикаси, Жибути, Доминика, Эфиопия, Миср, Габон, Гамбия, Гана, Малави, Қирғизистон, Либерия, Мави, Нигерия, Сент Китс ва Невис, Сент Люсия, Сан Томе ва Принсипи, Сенегал, Жанубий Судан, Сурия, Танзания, Тонга, Тувалу, Уганда, Вануату, Замбия, Зимбабве ва бошқалар кириши мумкин.
Июнь бошида Трамп 12 давлат фуқароларининг АҚШга киришини тақиқлаб, яна еттитасига чеклов қўйган эди. Тўлиқ тақиқ Афғонистон, Мянма, Чад, Конго Республикаси, Экваториал Гвинея, Эритрея, Гаити, Эрон, Ливия, Сомали, Судан ва Яман фуқароларига тегишли. Қисман тақиққа Бурунди, Куба, Лаос, Сьерра Леоне, Того, Венесуэла ва Туркманистон фуқаролари тушди.