Economist Intelligence Unit — Economist журналининг таҳлилий бўлими дунёдаги яшаш учун энг қулай шаҳарлар (Global Liveability Index 2025) рейтингини эълон қилди. Унда биринчи ўринни Дания пойтахти Копенгаген эгаллади.
Бу йил рўйхатга 173 та шаҳар киритилган. Баҳолаш бешта параметр асосида амалга оширилади: соғлиқни сақлаш, маданият ва атроф-муҳит, таълим, инфратузилма, барқарорлик.
Economist`нинг қайд этишича, дунёдаги беқарорлик туфайли бутун дунё бўйлаб шаҳарлардаги турмуш шароитлари кетма-кет иккинчи йил яхшиланмаяпти. Аввалроқ кетма-кет уч йил рейтингда етакчилик қилган Вена олди олинган иккита теракт — бири америкалик қўшиқчи Тейлор Свифтнинг концертида, иккинчиси темирйўл вокзалида — туфайли биринчи ўриндан маҳрум бўлди. Ҳозирда Австрия пойтахти Швейцариянинг Цюрих шаҳри билан иккинчи ўринни бўлишиб турибди.
Шунингдек, кучли ўнталикка Австралиянинг Мельбурн, Швейцариянинг Женева, Австралиянинг Сидней, Япониянинг Осака, Янги Зеландиянинг Окленд, Австралиянинг Аделаида ва Канаданинг Ванкувер шаҳарлари кирди.
Лондон ва Нью Йорк мос равишда 54 ва 69-ўринларни эгаллаган. Бу шаҳарларда жиноятчилик даражаси ва терроризм хавфи юқори, йўллар эса тирбанд, деб ёзади Economist. Дунёнинг энг йирик шаҳри Токио 13-ўринда.
Рейтингнинг сўнгги ўринларини Бангладеш пойтахти Дакка, Ливиянинг Триполи ва Суриянинг Дамашқ шаҳарлари эгаллаган.
Economist инфографикаси.
Рейтингни тўлалигига кўриш имконияти йўқ, шунинг учун Тошкент унинг қайси поғонасидан жой олгани номаълум. Шу билан бирга, эълон қилинган графикда Ўзбекистон пойтахти оч кулранг рангга бўялган, яъни максимал қиймати 100 балл бўлган ҳолда 50 дан 60 баллгача тўплаган. Масалан, Копенгагенда 98 балл бор.