Эрон олий диний раҳбари Али Ҳоманаий 18 июнь куни Ғарб оммавий ахборот воситаларининг АҚШ Теҳрон ва Исроил ўртасидаги можарога қўшилиши мумкинлиги ҳақидаги хабарлари фонида телемурожаат билан чиқди.
«Эронни, унинг халқини ва тарихини биладиган доно одамлар ҳеч қачон бу халққа таҳдид тили билан гапирмайди, чунки Эрон халқи таслим бўладиганлардан эмас. Америкаликлар шуни билиши керакки, АҚШнинг ҳар қандай ҳарбий аралашуви, шубҳасиз, улар учун тузатиб бўлмас зарарга айланади», — дейилади Ҳоманаийнинг Эроннинг Irna давлат ахборот агентлиги томонидан эълон қилинган баёнотида.
Ҳоманаий, шунингдек, Исроил Теҳронга қарши ҳарбий операцияни АҚШ ва Эрон билвосита музокаралар олиб борган ва Эрон томонидан «ҳарбий ёки шафқатсиз ҳаракатлар» белгилари бўлмаган пайтда бошлаганини таъкидлади. Эрон дастлаб Вашингтон Исроил ҳужумига «қўшилган» деб гумон қилган ва бу «гумонлар» АҚШ расмийларининг сўнгги баёнотлари туфайли кучаймоқда, дея қўшимча қилди у.
Аввалроқ АҚШ президенти Дональд Трамп Эроннинг Исроил билан урушда «сўзсиз таслим бўлишини», шунингдек, унинг ядро дастуридан «тўлиқ воз кечишини» кутаётганини айтганди.
«Эрон мен имзолашни айтган «битим»ни имзолаши керак эди. Нақадар шармандалик ва инсон умрининг зое кетиши. Содда қилиб айтганда, Эрон ядро қуролига эга бўла олмайди. Мен буни қайта-қайта такрорладим! Ҳамма зудлик билан Теҳрондан эвакуация қилиниши керак!» — деб ёзди АҚШ президенти 17 июнь куни Truth Social ижтимоий тармоғида.
Кейинроқ Трамп Вашингтоннинг сабр-тоқати «тугаётганини» айтди ва АҚШ Ҳоманаий қаерда яширинганини аниқ билишини таъкидлади.
«У осон нишон, аммо у ерда хавфсиз, биз уни ўлдиришни режалаштирмаяпмиз, энг камида ҳозирча. Аммо биз ракеталар тинч аҳоли ёки америкалик аскарлар устига учишини хоҳламаймиз. Сабримиз тугаб бормоқда», — деб ёзди Трамп Truth Social ижтимоий тармоғида.
Аввалроқ ABC телеканали АҚШ расмийлари орасидаги манбаларга таяниб, Трамп яқин 24−48 соат ичида Исроилнинг Эрон билан можаросини дипломатик йўл билан ҳал қилиш мумкинлиги ёки АҚШ бунинг ўрнига ҳарбий ҳаракатларга ўтиши ҳақида қарор қабул қилиши ҳақида хабар берганди.
- Исроил ва Эрон ўртасидаги зарбалар алмашинуви 13 июндан бери давом этмоқда. Исроил Эронга қарши ҳарбий операция бошланганини эълон қилиб, мамлакат ядро қуроли яратишга яқин тургани ва бу Исроил давлатининг «яшаб қолиши учун хавф» туғдиришини айтди. Эрон бу айбловларни рад этиб, Исроил ҳудудига ракета зарбалари билан жавоб қайтарди. Эронда жанговар ҳаракатлар бошланганидан бери камида 224 киши, Исроилда эса 24 киши ҳалок бўлди.