Хитой Эронга яқинлашганда радарлардан йўқолиб қоладиган сирли транспорт самолётларини жўнатмоқда. Бу ҳақда Британиянинг The Telegraph газетаси хабар берди.
Ҳаво кемалари 14—16 июнь куни учиб кетган. Аниқланишича, ҳар бир учоқ Қозоғистон, Ўзбекистон ва Туркманистон устидан ўтиб, Эронга яқинлашганда радарлардан ғойиб бўлган.
Бундан ташқари, парвоз режасида охирги манзил сифатида Люксембург кўрсатилган бўлса-да, амалда самолёт Европа ҳаво ҳудудига яқинлашмаган бўлиши эҳтимоли бор.
Парвозларни Boeing 747 юк самолётлари амалга оширган. Авиация экспертларининг маълумотларига кўра, бу турдаги самолётлар одатда ҳарбий техника ва қурол-яроғларни ташиш учун қўлланилади.
Хитойнинг Яқин Шарқ ва Шимолий Африка билан муносабатларига ихтисослашган Англиянинг Ekseter университети ўқитувчиси Андреа Гизеллининг таъкидлашича, ушбу юклар “катта қизиқиш уйғотмаслиги мумкин эмас, чунки Хитойнинг Эронга қандайдир тарзда ёрдам бериши кутилмоқда”.
“Ҳозирги Эрон режимининг қулаши жиддий зарба бўлиб, Яқин Шарқда катта беқарорликни келтириб чиқаради. Бу эса пировардида Пекиннинг иқтисодий ва энергетика манфаатларига путур етказади”, дейди Андреа Гизелли.
Таъкидланишича, Исроил Миллий хавфсизлик тадқиқотлари институтининг Хитой ва Яқин Шарқ бўйича мутахассиси Тувия Геринг Пекиннинг Теҳронга ҳарбий мақсадлар учун материаллар жўнатаётганини истисно этмаган.