18 июнь куни тушдан кейин Қирғизистон пойтахти Бишкек ва унинг атрофидаги бир қанча туманларда электр таъминотида узилишлар юз берди, деб хабар берди Kaktus.media.
ОАВ Жогорку Кенеш йиғилишидан кадрлар билан бўлишди. Депутатлар Адолат масалалари бўйича кенгаш аъзоларини электр энергиясисиз сайлади.
Бишкек милицияси Патруль хизмати бошқармаси инспекторлари светофор ўрнатилган чорраҳаларда ҳаракатни тартибга солди.
Соғлиқни сақлаш муассасалари генераторларга ўтказилди. Қирғизистон ва Қозоғистон ўртасидаги «Ақ-Тилек» чегара постида тирбандлик юзага келди. Кейинроқ назорат-ўтказиш пункти иш фаолиятини нормал давом эттирди.
Қирғизистон Энергетика вазирлиги «Бишкек ва унга яқин ҳудудларда электр таъминоти узилишига олиб келган фавқулодда вазият фактини» тасдиқлади.
«Энергетика вазирлиги мутахассислари ҳодиса сабабларини аниқлаш ва оқибатларини бартараф этиш бўйича тезкор иш олиб бормоқда. Янгиланган маълумотлар имкон қадар қисқа вақт ичида тақдим этилади», — таъкидлади идора.
Тахминан бир ярим соатдан кейин электр таъминоти тикланди.
Бишкек мэрияси мутахассислар Бишкек иссиқлик электр станциясига юкламани ошириш, шунингдек, иссиқлик тармоқларининг гидравлик режимини тиклаш бўйича иш олиб бораётганини таъкидлади, деб ёзди 24kg.
Kaktus.media’га Энергетика вазирлигининг хабар беришича, авария пойтахтга хизмат кўрсатувчи йирик нимстанцияда содир бўлган.
Бир кун аввал, 17 июнь куни Тошкент шаҳрининг учта туманида «Сокин» нимстансиясидаги носозлик туфайли электр энергияси узилганди.
Бишкекда ҳам, Тошкентдаги каби, шу кунларда кучли жазирама кузатилмоқда, ҳаво ҳарорати +40 даражага етган.