Шамол йўналиши ўзгариши муносабати билан Тошкент аэропортида соат 16:03 да самолётлар қўниши ва жўнашига вақтинчалик чекловлар жорий этилди, деб хабар қилди Uzbekistan Airports матбуот хизмати.
Бир қанча рейслар Самарқанддаги муқобил аэродромга йўналтирилди. Хусусан:
- Qanot Sharq авиакомпаниясининг HH-2232 Камран — Тошкент йўналиши бўйича (қўниш 16:35 да);
- Uzbekistan Airways’нинг HY-9732 Махачқалъа — Тошкент йўналиши бўйича (қўниш 16:42 да);
- Uzbekistan Airways’нинг HY-424 Деҳли — Тошкент йўналишида (қўниш 16:51 да).
Бундан ташқари, Air Astana авиакомпаниясининг Остона — Тошкент йўналишидаги КC-123 самолёти Туркистондаги муқобил аэродромга йўналишга қарор қилди.
Соат 16:30 да вазият барқарорлашди, Тошкент аэропортида самолётларнинг келиши ва жўнашига қўйилган чекловлар бекор қилинди. Аэропорт нормал режимда ишламоқда, дейилади компания хабарида.
Муқобил аэродромларга қўнган самолётлар Тошкентга учишга ҳозирлик кўрмоқда.
Шамол йўналиши ўзгариши — бу қисқа масофа давомида шамолнинг йўналиши ёки тезлиги кескин ўзгарадиган ҳолат. У горизонтал ёки вертикал бўлиши мумкин ва самолётга горизонтал парвоз, кўтарилиш ёки қўниш пайтида таъсир кўрсатади.
