Россия президенти Владимир Путин ва АҚШ президенти Дональд Трамп 3 июль куни қарийб бир соат давом этган навбатдаги телефон мулоқотини ўтказди.
Россия президенти ёрдамчиси Юрий Ушаковга кўра, Трамп гапни АҚШ Конгрессида маъмуриятнинг солиқ, миграция ва энергетика соҳаларидаги ислоҳотлар тўғрисидаги қонун лойиҳаси муваффақиятли ўтгани ҳақида маълумот беришдан бошлаган. Трампнинг ўзи бу қонун лойиҳасини «Катта ажойиб қонун лойиҳаси» деб атайди.
Шунингдек, Владимир Путин «ўзларига ва Трамп маъмуриятига яқин бўлган анъанавий қадриятларни тарғиб қилувчи кино маҳсулотларини алмашиш» ҳақида фикр билдирди. Трамп дарҳол реакция билдирди ва бу ғоя унга маъқул келганини айтди, дейди Ушаков.
Эрон атрофидаги ва, умуман, Яқин Шарқдаги вазият муҳокама қилинди. Шунингдек, Суриядаги воқеаларнинг сўнгги ривожига ҳам тўхталиб ўтилди ва бу йўналишда Россия ва Америка томонлари худди шу тарзда мулоқотни давом эттириши маълум қилинди.
«Табиийки, Украина муаммоси муҳокама қилинди. Дональд Трамп яна бир бор ҳарбий ҳаракатларни тезроқ тўхтатиш масаласини ўртага қўйди. Владимир Путин, ўз навбатида, биз можаронинг сиёсий музокаралар ечимини излашда давом этаётганимизни таъкидлади. У Истанбулда бўлиб ўтган Россия-Украина тўғридан-тўғри мулоқотининг иккинчи раундида эришилган гуманитар келишувларнинг амалга оширилиши ҳақида маълумот берди. Шунингдек, у Россия томонининг музокаралар жараёнини давом эттиришга тайёрлигини таъкидлади», — дея Ушаковнинг сўзларини келтиради Кремль.
Ушаковнинг таъкидлашича, Путин Трампга «Россия ўз олдига қўйган мақсадларига эришишини, ҳаммага маълум бўлган асосий сабабларни бартараф этишини ва бу мақсадларидан қайтмаслигини» маълум қилган.
Ўз навбатида, Трамп Путин билан суҳбатдан ҳафсаласи пир бўлганини айтди, чунки Россия Украинага қарши урушни тўхтатмоқчи эмас, деб ёзмоқда Reuters.
«Президент Путин билан бугунги суҳбатдан ҳафсалам жуда пир бўлди, чунки у бунга [урушни тўхтатишга] тайёр эмас деб ўйлайман ва жуда ҳафсалам пир бўлди. Менимча, у тўхташни хоҳламайди ва бу жуда ёмон. Мен у билан ҳеч қандай прогрессга эришмадим», — деб айтган Трамп журналистларга. Трамп жума куни Украина президенти Владимир Зеленский билан гаплашишни режалаштирмоқда.
АҚШнинг Россиянинг Украинадаги урушини дипломатик йўл билан якунлаш ҳаракатлари асосан самарасиз қолмоқда. Шу билан бирга, Трамп, ҳатто айрим республикачилар томонидан ҳам, Путинни жиддий музокараларга мажбур қилиш учун босимни кучайтириш тўғрисидаги чақириқларга тобора кўпроқ дуч келмоқда, деб таъкидлади Reuters.
Қўнғироқ тугаганидан бир неча соат ўтгач, Киевнинг шимолий чеккасидаги кўп қаватли уйда Россия дронларининг ҳужуми ёнғин келтириб чиқарди. «Бу Россия уруш ва террорга барҳам бермаслигини яна бир бор намойиш этди», — деб ёзди Украина президенти Зеленский.