UFC матбуот хизмати 26 июль куни Абу-Дабида (БАА) бўлиб ўтган UFC on ABC 9 мусобақаси натижалари асосида спортчиларнинг янгиланган рейтингини эълон қилди. Унга кўра, ўзбекистонлик аралаш жанг санъати устаси Богдан Гусков ярим оғир вазн тоифасида кучли ўн нафар спортчи қаторига кирди.
Гусков Абу-Дабида ўтган турнирда россиялик Никита Криловни биринчи раунддаёқ техник нокаут эвазига мағлуб этди. Ушбу ғалабадан сўнг, у ярим оғир вазн тоифаси рейтингида уч поғонага кўтарилиб, 10-ўринни эгаллади. Крилов эса икки поғонага пастлаб, 12-ўринга тушиб кетди.
Шунингдек, ушбу оқшомнинг асосий жангларидан бири — ўрта вазн тоифасидаги баҳсда октагонга чиққан нидерландиялик Ренье де Риддер австралиялик Роберт Уиттакер устидан ҳакамлар қарори билан ғалаба қозонди. Ушбу ғалабадан сўнг, де Риддер рейтингда саккиз поғонага кўтарилиб, 5-ўринни эгаллади. Уиттакер эса икки поғонага пастлаб, 7-ўринга тушиб кетди.
Маълумот учун, Богдан Гусков UFC промоушени доирасида ҳозиргача 5 та жанг ўтказиб, шулардан 4 мартасида ғалаба қозонган бўлса, 1 баҳсда мағлубиятга учраган. Ўзбекистонлик аралаш жанг санъати устаси кетма-кет тўртинчи жангини муддатидан аввал якунлаб, ўзига хос натижани қайд этган.