Келишувга кўра, Ўзбекистон Мўғулистондан 100 минг бош тирик қўй ва эчки сотиб олиши керак.
13 август куни Мўғулистон Озиқ-овқат, қишлоқ хўжалиги ва енгил саноат вазирлиги давлат котиби Жамбалсерен Темур-Уя Ўзбекистон инвестициялар, саноат ва савдо вазири ўринбосари Илзат Қосимов бошчилигидаги делегацияни қабул қилди.
Учрашув аввалида Илзат Қосимов икки давлат президентларининг сўнгги йилдаги ўзаро ташрифлари якунлари бўйича келишилган ишлар қисқа муддатларда амалга оширилаётганини таъкидлади. Масалан, Ўзбекистон Мўғулистондан 100 минг бош тирик қўй ва эчки сотиб олишга рози бўлди ва 15 минг бош қўй жўнатишга тайёр эканини эълон қилди.
Бундан ташқари, у Мўғулистондан Ўзбекистонга экспорт қилинадиган қўй гўшти мамлакат истеъмолчилари орасида талабга эга эканини таъкидлади. Маълум қилинишича, келажакда Мўғулистонда қайта ишланган қўй гўшти тўғридан-тўғри мамлакатнинг тармоқ дўконларига сотилиши мумкин.
Илзат Қосимов икки томон ўртасида гўшт савдоси тармоғини биргаликда яратишда хусусий сектор асосий рол ўйнашини айтиб, Мўғулистон гўшт ва гўшт маҳсулотлари ишлаб чиқарувчиларини Ўзбекистонда ишлашга таклиф қилди. Унинг айтишича, бу йўналишда жун ва кашемир тармоқларида ҳамкорлик қилиш учун кенг имкониятлар мавжуд.