Татаристонда юз берган йўл-транспорт ҳодисасида 3 нафар Ўзбекистон фуқароси ҳалок бўлди, деб хабар бермоқда Қозон шаҳридаги Ўзбекистон бош консулхонаси.
Ҳодиса 5 сентябрь куни Татаристоннинг Заинск туманидан ўтган «Набережные Челны — Альметьевск» трассасининг 38-километрида содир бўлган, Daewoo Nexia русумли автомашина ва MAN юк автомашинаси тўқнашиб кетган. ЙТҲ оқибатида 30, 33 ва 35 ёшли уч нафар Ўзбекистон фуқаролари воқеа жойида вафот этган.
Қайд этилишича, вазият Ўзбекистоннинг Қозон шаҳридаги бош консулхонаси томонидан назоратга олинган, маҳаллий мутасадди идоралар билан алоқа ўрнатилиб, вафот этган фуқароларнинг жасадларини ватанга қайтариш чоралари кўрилмоқда.
2025 йил февралида Россиянинг Перм ўлкасида рўй берган ЙТҲда 3 нафар Ўзбекистон фуқароси ҳалок бўлган, яна 3 киши турли хил жароҳатлар билан шифохонага жойлаштирилган эди.
Апрелда эса Россиянинг Саратов вилоятида Ўзбекистон фуқаролари бўлган Lada Largus йўлда турган юк автоуловига урилиб, енгил автомобиль ёниб кетганди. Оқибатда бир ўзбекистонлик ҳалок бўлиб, 5 киши жароҳат олган.
