Непалда ижтимоий тармоқларнинг блокланишига қарши намойишлар чоғида камида 19 киши ҳалок бўлди ва 100 дан ортиқ киши жароҳатланди. Митинглар Катманду ва мамлакатнинг бошқа шаҳарларида бўлиб ўтди, деб хабар бермоқда Reuters. Жабрланганлар орасида 28 нафар полициячи ҳам бор.
Минглаб ёшлар, жумладан, талабалар ва мактаб ўқувчилари кўчага чиқди. Намойиш ташкилотчилари ўз акцияларини «Z авлод намойишлари» деб номлади. Намойишчилар «Ижтимоий тармоқлар эмас, коррупция билан курашинг», «Ижтимоий тармоқларни очиб қўйинг» ва «Ёшлар коррупцияга қарши» деган шиорлар битилган плакатларни кўтариб чиқди. Баъзилар Катмандудаги парламент биносига бостириб киришга уринди, полиция уларга қарши кўздан ёш оқизувчи газ, сув пуркагичлар ва резина ўқлардан фойдаланди.
Полицияни қўллаб-қувватлаш учун шаҳарга армия киритилди. Ҳукумат, шунингдек, бош вазир идораси ва бошқа давлат идоралари жойлашган Сингҳа Дурбар ҳукумат кварталида комендантлик соати жорий қилди.
Ўтган ҳафта Непал ҳукумати сохта хабарлар тарқатиш ва фирибгарлик каби суиистеъмолликларга қарши курашиш учун платформалар давлат органларида рўйхатдан ўтмаганини айтиб, бир нечта ижтимоий тармоқларга киришни тақиқлаганди. Тақиқ остига, хусусан, Facebook, Х ва YouTube тушган.
Қарор ёшлар орасида норозилик уйғотди, деб таъкидлайди Reuters. Агентлик маълумотларига кўра, Непалнинг 30 миллион аҳолисининг қарийб 90 фоизи интернетдан фойдаланади.
- Июль ойи ўрталарида Непал Telegram мессенжерини «онлайн фирибгарлик ва пул ювиш»га сабаб бўлгани учун блоклашни буюрганди. 2024 йилда Непал полицияси транзакция дастурий таъминотига бузиб кирилишда алоқа учун Telegram`дан фойдаланилганини аниқлаган ва шундан сўнг назорат кучайтирилган.
