25 сентябрдан бошлаб Тошкент — Чиноркент йўналишида қатновчи экспресс электропоездининг чипта нархи оширилади, дея хабар бермоқда «Ўзтемирйўлйўловчи» компанияси матбуот хизмати.
Эндиликда чипта нархи қуйидагича бўлади:
- катталар учун — 30 минг сўм;
- болалар учун — 16 500 сўмн.
Шу пайтгача поездда йўл ҳақи катталар учун 20 минг сўм, болалар учун 11,5 минг сўм бўлиб келаётганди.
Аввалроқ Ўзбекистонда шаҳарлараро ҳаракатланувчи, жумладан, Тошкент — Чиноркент каби поездларга чиптани онлайн харид қилиш имкони яратилганди. Билетлар elektropoyezd.uz сайтида фақат жорий кун учун сотилади. Уларни сақлаб қўйиш ва поезд кузатувчисига кўрсатиш зарур.
Эслатиб ўтамиз, 2024 йилнинг декабрь ойида ушбу йўналишда янги электропоезд қатнови йўлга қўйилди. Саёҳат учун АТТО саёҳат картаси (жамоат транспортида саёҳат қилиш учун ишлатилади) орқали тўлаш ёки онлайн чипта харид қилиш мумкин. Янги электропоезд билан Gazeta фоторепортажида танишишингиз мумкин.
Авваллари Тошкентдан Хўжакентгача қатнаган электропоезд қатнови 2025 йил январь ойи охиридан 1,5 км масофага — Чорвоқ шаҳарчасида яқинида жойлашган «Чиноркент» бекатигача узайтирилди.
