Ўзбекистонда 9579 та кўп қаватли уйнинг сейсмик бардошлилиги ва сейсмик хавфсизлик талабларига мувофиқлиги текширилди. Қурилиш ва уй-жой коммунал хўжалиги соҳасида назорат қилиш инспекциясининг маълум қилишича, объектларнинг 87 фоизи (8337 та бино) меъёрга мувофиқлиги аниқланган.
Бироқ 1242 та бино инструментал-техник текширувларни талаб қилади. Ҳозирги вақтда 336 та бинода шундай текширувлар ўтказилди:
- 297 та бинонинг сейсмик мустаҳкамлиги тасдиқланди,
- 71 та бино мустаҳкамлаш ишларини талаб қилади,
- 1 та бино сейсмик жиҳатдан заиф деб топилди.
Қурилиш сифати паст бўлган 396 та объект бўйича материаллар ҳуқуқни муҳофаза қилувчи органларга юборилди. 200 га яқин рухсат этилмаган қурилиш объектлари устидан судга даъво аризалари киритилди, 100 дан ортиғи аллақачон бузиб ташланди. Қурилиш қоидаларини қўпол равишда бузган 40 та ҳолат бўйича жиноят иши қўзғатилиб, тергов ҳаракатлари олиб борилмоқда.
Ноқонуний устки иншоотлар ва кўпайтирилган қаватлар
Текширув натижаларига кўра, 201 та қаватлар сонини рухсатсиз кўпайтириш ҳолатлари қайд этилган. Энг ёрқин мисоллардан бири Тошкент шаҳрининг Яшнобод туманидаги уй-жой бўлиб, у ерда қурувчи рухсат этилган 14 қават ўрнига 21 қаватли уй қурган, бу эса шаҳарсозлик меъёрларига зид. Инспекциянинг саккизта ёзма буйруғига қарамай, ишлар давом эттирилган. Қурилиш тўхтатилди, қўшимча қават қуриш бўйича судга даъво қўзғатилди, қўшимча қаватларнинг сейсмик чидамлилигини баҳолаш бўйича ишчи гуруҳ тузилмоқда.
Ҳудудий инспекцияларининг 242 208 та мониторинг текшируви натижаларига кўра:
- 106 905 та ёзма буйруқ чиқарилди,
- жами қарийб 40 миллиард сўмлик 2653 та маъмурий баённома расмийлаштирилди.
- қурилиш-монтаж ишлари сифати паст 712 та ҳолатда демонтаж ишлари жойида амалга оширилди.
2025 йил ҳолатига кўра, инспекция реестрига 27 372 та объект киритилган бўлиб, уларнинг мониторинги давом этмоқда.
Июнь ойи ўрталарида президентга тақдимот чоғида янги биноларнинг сейсмик чидамлилиги камида 9 балл бўлиши кераклиги хабар қилинганди. Ҳар бир лойиҳа бўйича комплекс хулоса тузилади.
