Kun.uz ички ишлар идораларидаги манбаларга таяниб, 13 киши ҳалок бўлгани ҳақида хабар берди. Ҳозирча бу маълумотни расмийлар тасдиқлагани йўқ.
Тошкент вилояти Ангрен шаҳрида юз берган йирик автоҳалокатда 11 киши ҳалок бўлган. Бу ҳақда Фарғона вилояти ҳокими Хайрулло Бозоровнинг фармойишида сўз боради, дея хабар бермоқда Daryo. Ҳужжатга кириш вақт ўтиб ёпиб қўйилган.
9 сентябрда имзоланган фармойишда айтилишича, ушбу ЙТҲ оқибатида 6 киши турли даражада тан жароҳатлари олиб шифохонага жойлаштирилган. Уларга Ангрен шаҳри тиббиёт бирлашмасида зарур тиббий ёрдам кўрсатилаётгани билдирилган.
Ички ишлар вазирлигининг 7 сентябрдаги ахборотида эса 7 киши ҳалок бўлгани, 5 нафари тиббиёт муассасаларига ётқизилгани, 4 нафар шахсга тиббий ёрдам кўрсатилиб, уйларига жавоб берилгани маълум қилинганди.
Эслатиб ўтамиз, Ангрендаги трассада бензовоз, юк машинаси ва бир нечта енгил автомобиль иштирокида йирик ЙТҲ содир бўлган. Тўқнашувдан сўнг ёнғин келиб чиққан ва йўлда ҳаракат бутунлай тўхтаган.
Ижтимоий тармоқларда тарқалган кадрларда ёнаётган автомобиллар, жумладан, бутунлай аланга ичида қолган бензовоз акс этган. Яна бир видеода қурбонлардан бири ёнаётган юк машинасидан тушишга уринаётганини кўриш мумкин. Кейинроқ машина ёниб кетган.
Ҳолат юзасидан Жиноят кодексининг 266-моддаси 3-қисми (Одамлар ўлишига сабаб бўлган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган.
Ушбу бахтсиз ҳодиса қурбонлар сони бўйича Ўзбекистонда сўнгги йиллардаги энг йирикларидан бири бўлди.
Фармойишда, шунингдек, вилоят ҳокимининг ўринбосарлари ва тегишли ташкилотлар ЙТҲ оқибатида вафот этганларнинг шахсига аниқлик киритиши, уларнинг оила аъзоларига ҳамда жабрланганларга тиббий, моддий, психологик ва бошқа ёрдамлар кўрсатиши белгиланган. Ҳалок бўлганларни дафн маросимлари билан боғлиқ комплекс чора-тадбирлар амалга оширилиши қайд этилган.
Бундан ташқари, ҳужжатда ЙТҲнинг келиб чиқиш сабаблари ўрганилган ҳолда келгусида шу каби ҳодисаларининг олдини олиш мақсадида йўл-транспорт инфратузилмасини хатловдан ўтказиш ҳамда илғор хорижий тажрибани ўрганган ҳолда, уларни такомиллаштириш, шунингдек, юк ташиш қоидаларини янада қайта кўриб чиқиш бўйича асосланган таклифлар тайёрлаш топширилган.
Эслатиб ўтамиз, 2021 йилнинг май ойида Ангреннинг тахминан худди шу қисмида йирик ЙТҲ содир бўлиб, 7 киши ҳалок бўлган, 14 киши жароҳатланган эди.