Франция президенти Эммануэль Макрон 2022 йилдан бери мудофаа вазири лавозимида ишлаб келаётган Себастьен Лекорнюни ҳукуматнинг янги раҳбари этиб тайинлади, деб ёзмоқда Le Monde.
Макрон Лекорнюга «яқин ойларда мамлакат бюджетини қабул қилиш учун парламентда вакиллик қилаётган сиёсий партиялар билан маслаҳатлашиш» вазифасини топширди, дея маълум қилди Елисей саройи. Янги бош вазир президентга ҳукумат таркибини таништириши керак бўлади.
Лекорню Х ижтимоий тармоғидаги постида Макронга «кўрсатилган ишонч учун» миннатдорлик билдирди.
Макрон 2022 йилда иккинчи муддатга қайта сайланганидан сўнг Лекорню Франция ҳукуматини бошқарадиган бешинчи бош вазир бўлди. 8 сентябрь куни парламентда ишонч вотумини бой берган Франсуа Байру кабинети истеъфога чиқди.
Байру 2024 йил декабридан бошлаб салкам тўққиз ой бош вазир бўлди. Ҳукуматнинг аввалги раҳбари Мишель Барьне бу лавозимда уч ой ишлаган.
39 ёшли Лекорню Макрон 2017 йилда президент бўлганидан бери Франция ҳукуматида узлуксиз ишлаган. У Макроннинг ишончли вакили ҳисобланади, деб таъкидлади Le Monde.
- Франциядаги сиёсий инқироз 2024 йил июль ойида Макрон Миллий ассамблеяни тарқатиб юборган ва муддатидан олдин парламент сайловларини тайинлаганидан бери давом этмоқда. Бунга аввалроқ бўлиб ўтган Европарламент сайловларида ўта ўнгчи «Миллий бирлашув» (RN) ғалаба қозонгани сабаб бўлди. Овоз беришнинг икки босқичи (2024 йил 30 июнь ва 7 июль) натижаларига кўра, Франция парламентида 180 ўринга эга бўлган «Янги халқ фронти» (NFP) сўл партиялар коалицияси биринчи ўринни эгаллади. Иккинчи ўринни Макроннинг марказчи «Биргаликда» коалицияси 159 ўрин билан банд этди. Марин Ле Пен бошчилигидаги RN партияси учинчи ўринни эгаллади, аммо парламентдаги иштирокини 142 ўрингача кенгайтира олди.
