Бокс бўйича Ўзбекистон терма жамоаси 4−14 сентябрь кунлари Англиянинг Ливерпуль шаҳрида ўтказилган катталар ўртасидаги Жаҳон чемпионатини 11 та медаль билан якунланди, дея хабар бермоқда Ўзбекистон Бокс федерацияси.
Дунёнинг 68 мамлакатидан 540 нафар боксчи иштирок этган мусобақада Ўзбекистон терма жамоаси 6 та олтин, 2 та кумуш ва 3 та бронза медаллари билан умумжамоа ҳисобида иккинчи ўринни эгаллади.
Олтин медаль
- -60 кг: Абдумалик Халоков;
Абдумалик Халоков финалда бразилиялик Луиз Оливеирани 5:0 ҳисобида мағлуб этди.
- -65 кг: Асадхўжа Мўйдинхўжаев;
Боксчи бразилиялик Юри Реисни 4:1 ҳисобида мағлуб этиб, мусобақада тенгсиз бўлди.
- -75 кг: Фазлиддин Эркинбоев;
Эркинбоев болгариялик Киван Рамини 5:0 ҳисобида мағлубиятга учратди.
- -80 кг: Жавоҳир Умматалиев;
Жавоҳир Умматалиев финалда франциялик Ёжерлен Сезарни 5:0 ҳисобида мағлуб этди.
- -85 кг: Акмалжон Исроилов;
Спортчи мезбон Теагн Стоттни 5:0 ҳисобида мағлуб қилди.
- -92 кг: Тўрабек Ҳабибуллаев.
Хабибуллаев финалда бразилиялик Исаиас Рибеирони 5:0 ҳисобида мағлуб этди.
Кумуш медаль
-65 кг вазн тоифасидаги Навбаҳор Ҳамидова мусобақани иккинчи ўринда якунлади. Боксчи финалда қозоғистонлик Аида Абикеевага 0:3 ҳисобида мағлуб бўлди.
Навбаҳор Ҳамидова.
+92 кг вазн тоифасидаги Жаҳонгир Зокиров финалда қозоғистонлик Ойбек Оралбайга 2:3 ҳисобида имкониятни бой бериб қўйди.
Бронза медаль
Сабина Бобоқулова -48 кг вазнда бўлиб ўтган баҳсда қозоғистонлик Назым Кызайбайга 1:4 ҳисобида мағлуб бўлди ва Жаҳон чемпионатини учинчи ўринда якунлади. Феруза Казаковага -51 кг вазнда туркиялик Олимпиада ўйинлари совриндори Бусе Наз Чакыроглуга қарши баҳсда бироз омад етишмади. -70 кг вазн тоифасида ўзининг ярим финал баҳсини ўтказган Азиза Зокирова жангда аустралиялик Лекеиша Перголитига 0:5 ҳисобида мағлуб бўлди.
Ўзбекистон эркаклар ва аёллар жамоалари Ливерпулдаги турнирга жами 18 нафар боксчи билан борганди. Якунда шундан 11 спортчи совриндор бўлди, 7 нафари эса медалсиз қолди.