Жиноят ишлари бўйича Бўка туман суди ўзининг 17 ёшли синфдоши Дилшодни ўлдирган 16 ёшли ўсмирни 8,5 йилга озодликдан маҳрум қилди. Бу ҳақда «Миллар» дастурида хабар берилди.
Воқеа 6 июнь куни Тошкент вилояти Чиноз туманининг Яллама қишлоғида юз берган. Иш ҳужжатларига кўра, футбол майдонида ўсмирлар ўртасида жанжал содир бўлган, улардан бири иккинчисига пичоқ билан зарба берган. Жабрланувчи вафот этган.
Судда судланувчи ўз айбига иқрор бўлиб, муштлашув чоғида Instagram’дан «қизиқиб, эсдаликка олиб қўйган» очилиб-ёпиладиган кичкина пичоқдан фойдаланганини айтди. Унинг сўзларига кўра, у тез ёрдамга қўнғироқ қилган ва синфдошининг жароҳатига футболкасини босиб турган. Ўсмир марҳумнинг оиласидан кечирим сўради.
Судда марҳумнинг онаси маълум қилишича, судланувчи ҳужум қилганидан кейин қочиб кетган, унинг ўғлига бошқа ўртоқлари ёрдам берган, тез ёрдам чақирган, касалхоналарга олиб борган. Унинг сўзларига кўра, айбланувчи кейинроқ тоғаси билан бирга пичоқни қидиргани келган. Аёлнинг айтишича, айбланувчининг оиласи суд яқинлашганидан бери улардан хабар олишни ва енгилроқ жазо сўрашни бошлаган. Аммо аёл оғир жазо беришни талаб қилди.
Суд муқаддам судланган йигитни Жиноят кодексининг 97-моддаси (Қасддан одам ўлдириш) биринчи қисми билан айбдор деб топди ва бошқа жиноят бўйича ўталмай қолган ҳақ тўлаш жазосини қисман қўшиш йўли билан саккиз йилу олти ой муддатга озодликдан маҳрум қилиш жазосини тайинлади. Жазо тарбия колониясида ўтатилиши белгиланди.
