Ўзбекистон Атом энергияси агентлиги («Ўзатом») бошқарувчиси Азим Ахмедхаджаев Москвада бўлиб ўтган World Atom Week халқаро форумида Жиззах вилояти аҳолиси атом электр станцияси қурилишига ижобий муносабатда эканини айтди.
«Маҳаллий аҳолимиз: „Қачон? Қачон бошлайсизлар?“ деб сўраяпти. Улар ишнинг бошланишига ҳар томонлама кўмаклашмоқда, оқсоқоллар қурилиш майдонига келиб, қизиқишмоқда. Нима учун? Чунки улар бу лойиҳа кўп қиррали таъсирга эга эканлигини ва нафақат минтақага, балки бутун вилоятга барча йўналишларда ривожланиш олиб келишини тушунишади», — деди Азим Ахмедхаджаев.
Унинг таъкидлашича, станция бошқа соҳаларни ривожлантириш учун «триггер» бўлади.
«Одамлар бу станцияга хизмат кўрсатиш учун улкан маиший хизмат кластерини яратиш кераклигини тушунишади. Масалан, ижтимоий, инфратузилма объектлари қурилади. Вилоятда ҳаёт сифати каррасига ошади», — деди у.
Унинг таъкидлашича, одамлар шу билан бирга ўз ватанларида қолишни хоҳлашади.
«Биз уларнинг ҳеч қаерга кетишни истамаслигига қатъий ишончни кўрмоқдамиз. Улар бу тараққиётнинг иштирокчиси ва бу йўналишда пешқадам бўлишни истайдилар. Улар ўз мисолида бошқа ҳудудларга ҳам аслида яхши, юқори маданият даражасида яшаш мумкинлигини кўрсатишлари, шу билан бирга бунёдкорлик жараёнларида иштирок этишлари ва минтақа ривожланиш тарихининг бир қисми бўлишлари мумкин», — деди «Ўзатом» раҳбари.
Эслатиб ўтамиз, Ўзбекистонда катта қувватли атом электр станциясида биринчи энергоблок 2033 йилда, иккинчиси эса 2035 йилда ишга туширилади. Шунингдек, 2029 йилда Жиззах вилоятида кичик АЭСнинг биринчи энергоблокини ишга тушириш режалаштирилган, орадан яна ярим йил ўтиб иккинчи блок ҳам фаолият бошлайди.
Аввалроқ Ўзбекистон ядровий фалокат юз берган тақдирда аҳолига товон тўланишини таъминлаш кўзда тутилган Вена конвенциясини ратификация қилган эди.