Ўзбекистонда атом электр станцияларини қуриш бўйича жамоатчилик эшитувлари дастури яқин орада бошланади. Бу ҳақда «Ўзатом» агентлиги директори Азим Ахмедхаджаев 25 сентябрь куни Москвада бўлиб ўтган «Бутунжаҳон атом ҳафталиги» доирасида маълум қилди, деб ёзади Spot.
«Биз жамоатчилик эшитувлари бўйича катта концептуал дастур ишлаб чиқдик ва яқин вақт ичида ушбу дастурни бошлаймиз. Унда биз амалга оширмоқчи бўлган ишларни жамоатчиликка етказиш учун соҳадаги ва хорижий кўплаб мутахассисларни жалб қилиш назарда тутилган. Ҳар қандай ҳолатда ҳам жамоатчилик фикрисиз ҳеч қаерга силжимаймиз», — деди «Ўзатoм» раҳбари.
Унинг сўзларига кўра, аҳолидан фикр-мулоҳаза олиш ва жамоатчилик фикрига мувофиқ тарзда лойиҳага тузатишлар киритиш режалаштирилган.
Азим Ахмедхаджaев шунингдек, Жиззах вилояти аҳолиси атом электр станцияси қурилишини қўллаб-қувватлаётганини ва ишлар бошланишини кутаётганини маълум қилди. Унинг сўзларига кўра, аҳоли ушбу лойиҳа ҳудуднинг ривожланиши ва турмуш сифати ошишига туртки бўлади, деган фикрда.
Эслатиб ўтамиз, Ўзбекистонда катта қувватли атом электр станциясида биринчи энергоблок 2033 йилда, иккинчиси эса 2035 йилда ишга туширилади. Шунингдек, 2029 йилда Жиззах вилоятида кичик АЭСнинг биринчи энергоблокини ишга тушириш режалаштирилган, орадан яна ярим йил ўтиб иккинчи блок ҳам фаолият бошлайди.
Аввалроқ Ўзбекистон ядровий фалокат юз берган тақдирда аҳолига товон тўланишини таъминлаш кўзда тутилган Вена конвенциясини ратификация қилган эди.
