Ижтимоий тармоқларда ногиронлиги бўлган бола калтаклангани акс этган видео тарқалди. Мазкур тасвир тармоқларда кенг муҳокамаларга сабаб бўлмоқда.
Видеога олаётган аёл Сирдарё вилоятининг Боёвут туманида истиқомат қилишини, фарзанди эса Тошкентда зўравонликка учраганини таъкидлаган.
«Ўғлим иккинчи гуруҳ ногирони. Яхши ният билан Тошкент шаҳри Мирзо Улуғбек туманидаги 7-поликлиника олдида жойлашган [Имконияти чекланган болалар учун касб-ҳунар саноат] техникумига таълим олиши, ҳунар ўрганиши учун бергандим. Сентябрь ойида уч ҳафтагина ўқиди. 29 сентябрь куни ўғлимни олиб келишга борсам, болам мана шу аҳволда экан: баданлари кўкарган, урилган. Ўғлимнинг айтишича, кўкрагига муштлаб, орқасига эса камар билан уришибди. Ваҳшийларча урган, боламнинг тишини синдирган. Мана, пастки тиши синган. Юз кўриниши мана шундай, бугун кўзлари очилган ҳолати бу», — дейди она.
Унинг айтишича, 3 кундан буён фарзандидан ҳеч ким хабар олгани йўқ. «Боламга ким ёрдам беради? Ким менга бу ҳолатни тушунтириб беради? Ким шунчалик боламга зулм ўтказди? Ваҳшийларча урган, баданларига қараб бўлмайди. Илтимос, менга ёрдам беринглар. Боламнинг соғлиги, келажаги учун қилган шунча ҳаракатларимни бир пул қилди булар», — дея қўшимча қилган аёл.
Болалар омбудсмани Сурайё Раҳмонованинг Gazeta’га маълум қилишича, ташкилотга фуқаро Х.Г. томонидан мурожаат келиб тушган. Аёлга кўра, 2025 йилнинг сентябрь ойида Тошкентнинг Мирзо Улуғбек туманидаги касб-ҳунар техникумида таҳсил олаётган 2-гуруҳ ногиронлиги бўлган вояга етмаган фарзанди Р.Ф.га нисбатан мазкур муассасада турли жисмоний зуравонлик содир қилинган.
«Ҳозирда мазкур ҳолат юзасидан ички ишлар органлари томонидан терговга қадар текширув харакатлари олиб борилмокда. Болага етказилган жароҳатлар бўйича суд-тиббиёт экспертизаси тайинланган. Болалар омбудсмани ҳолат юзасидан ўз кузатувини давом эттиради», — дейди Раҳмонова.
Ижтимоий ҳимоя миллий агентлиги ушбу ҳолат юзасидан муносабат билдираркан, воқеани ҳар томонлама ва холисона ўрганиш мақсадида махсус ишчи гуруҳ тузилган.