Тошкент марказидаги Grand Mir (собиқ «Россия») меҳмонхонаси ўрнида 30 қаватли бизнес марказини қуриш лойиҳаси ҳозирча тасдиқланмаган. Бу Тошкент шаҳри прокурори ўринбосари Ҳабибулла Мирсоатовнинг меҳмонхона жойлашган Боғсарой маҳалласида яшовчи фуқарога берган жавоб хатиидан келиб чиқади.
Прокуратура шаҳар бош қурилиш бошқармасига сўров юборган бўлиб, унда Архитектура-шаҳарсозлик кенгаши ишчи комиссияси томонидан меҳмонхона ҳудудидаги объектнинг архитектура-режалаштириш спецификацияларини ишлаб чиқиш ва лойиҳа-смета ҳужжатларини тасдиқлаш бўйича аризалар кўриб чиқилмагани маълум қилинган.
Бундан ташқари, Вазирлар Маҳкамасининг 2024 йил 24 декабрдаги Тошкент шаҳрининг 2045 йилгача бўлган бош режасини тасдиқлаган қарорига кўра, кўрсатилган ҳудудда рухсат этилган қаватлар сони бештагача чекланган.
Ўзи нима бўлганди?
Gazeta аввалроқ эҳтимолий лойиҳа ва маҳаллий аҳолининг бунга муносабати ҳақида хабар берган эди. Июнь ойи охирларида ижтимоий тармоқларда Grand Mir меҳмонхонаси бузилиши ва унинг ўрнида учта бино, жумладан, 30 қаватли бизнес-марказ ва кўнгилочар савдо маркази қурилиши ҳақида хабарлар тарқалганди. ОАВ хабарига кўра, архитектура концепциясини Design Factory компанияси ишлаб чиққан бўлиб, у Koç Construction билан бирга Sarıkoç холдинги таркибига киради. Podrobno.uz маълумотларига қараганда, Design Factory вакили Шавкат Абдуллаев меҳмонхонани бузиш ишлари сентябрь ойида бошланиши ва йил охирига қадар якунланишини тасдиқлаган.
20 август куни Боғсарой маҳалла фуқаролар йиғини аҳли томонидан 2727 нафар фуқаро имзолаган лойиҳага қарши давлат идораларига жамоавий мурожаат йўлланган. Уларнинг таъкидлашича, қурилиш шаҳарсозлик, санитария ва сейсмик қоидаларга ҳамда Тошкент шаҳрининг бош режасига зиддир. Бундан ташқари, аҳоли маҳалла инфратузилмасининг аллақачон ортиқча юклама олаётганини таъкидламоқда.
