Оқ уй Американинг тўққиз университетига қўшимча федерал молиялаштириш эвазига президент Дональд Трамп маъмуриятининг сиёсий кун тартибини қўллаб-қувватлашни таклиф қилди, дея хабар бермоқда Associated Press.
«Олий таълимда академик мукаммалликка эришиш бўйича шартнома» деб номланган ҳужжатда университетлар Трамп маъмуриятининг талабалар қабули, аёллар спорти, сўз эркинлиги, талабалар интизоми ва таълимнинг очиқлиги каби масалалар бўйича устувор йўналишларига рози бўлишини таклиф қилади.
Масалан, университетлар АҚШ ҳукумати томонидан тан олинган жинс ўлчовларини қабул қилиши, бакалавриатга қабул вақтида талабаларнинг ирқи, жинси ва бошқа демографик хусусиятларини ҳисобга олишни тўхтатиши, шунингдек, абитуриентлардан SAT ёки ACT топширишни талаб қилиши керак.
Бундан ташқари, университетлар ўз кампусларини ягона ҳукмрон мафкура устун бўлмайдиган «жонли ғоялар бозори»га айлантириши керак. Бунинг учун улар фикрлар хилма-хиллигини таъминлаш учун ўз талабалари ва ходимларининг фикрларини баҳолаши керак бўлади.
Шартномани имзолаган университетлар «кўплаб ижобий имтиёзлар», жумладан, «сезиларли ва мазмунли федерал грантлар» олади ва «мумкин бўлганда, қўшимча харажатлари оширилади». Улар 21 ноябргача қарор қабул қилиши керак.
Таклиф бир қатор давлат ва хусусий университетларга, жумладан, Вандербильт университети, Массачусетс технология институти, Жанубий Калифорния университети ва Техас университетига берилган.
Ҳужжат Оқ уй стратегиясининг ўзгаришини очиб беради, деб таъкидламоқда AP. Трамп маъмурияти энди президентнинг кун тартибини қўллаб-қувватлаш учун рағбат сифатида нафақат жазо, балки мукофот ҳам таклиф қилмоқда.
Келишувдаги кўплаб талаблар аввал Оқ уй «либерал тарафкашликда» айбланган Гарвард, Колумбия ва бошқа университетларга қўйган талабларга мос келади, деб ёзади агентлик.
- 2025 йил апрель ойида Трамп маъмурияти муассаса академик сиёсатини Оқ уй талабларига мувофиқ ўзгартиришдан бош тортгани учун Гарвард университетининг 2,2 миллиард доллардан ортиқ грантлар ва шартномаларини музлатиб қўйганди. Гарвард бунга жавобан судга даъво аризаси киритди. Сентябрь ойида суд ҳукумат ўз ваколатларини ҳаддан ташқари оширган деб эълон қилиб, Гарвард университетини молиялаштиришни қисқартиришни бекор қилди.