Мэри Брункоу (Сиэтл тизимли биология институти, АҚШ), Фред Рамсделл (Sonoma Biotherapeutics, АҚШ) ва Шимон Сакагучи (Осака университети, Япония) «периферик иммунологик толерантлик бўйича кашфиётлар учун» 2025 йилда физиология ва тиббиёт бўйича Нобель мукофоти лауреатлари бўлди.
«Улар иммунитет тизимининг „қўриқчилари“ — иммунитет ҳужайраларининг танамизга ҳужум қилишининг олдини олувчи регулятор Т-ҳужайраларини аниқлади… Лауреатларнинг кашфиётлари периферик толерантликни ўрганишни бошлаб берди, саратон ва аутоиммун касалликларни даволаш усулларини ишлаб чиқишни рағбатлантирди. Бу, шунингдек, трансплантация самарадорлигини оширишга олиб келиши мумкин. Ушбу даволаш усулларининг баъзилари ҳозирда клиник синовлардан ўтказилмоқда», — дейилади Нобель қўмитаси пресс-релизида.
2024 йилда физиология ва тиббиёт бўйича Нобель мукофоти Виктор Эмброс ва Гэри Равкунга «микроРНКларни кашф этгани ва уларнинг ген экспрессиясининг транскрипциядан кейинги регуляциясидаги ролини ўргангани» учун берилганди.
«Нобель ҳафталиги» анъанавий равишда физиология ва тиббиёт бўйича мукофот совриндорларини эълон қилиш билан бошланади. 7 октябрь куни физика, 8 октябрь куни кимё, 9 октябрь куни адабиёт бўйича мукофот соҳиби маълум бўлади. Тинчлик мукофоти лауреати 10 октябрь куни эълон қилинади. 1969 йилда Швеция Банки томонидан таъсис этилган, Алфред Нобель хотирасига бағишланган иқтисодий фанлар бўйича мукофот 13 октябрь куни топширилади. Лауреатларни тақдирлаш маросими 10 декабрь куни Стокгольмда (Швеция) бўлиб ўтади.
