Сентябрь ойида Ўзбекистонга 114,4 миллион долларлик 11,5 минг дона электромобиль олиб кирилди. Бу ҳақда Божхона қўмитаси маълумотларида қайд этилган.
Машина импорти долларда ва бирликларда.
Қиймат жиҳатидан бу ўтган сентябрга нисбатан 7,4 баравар юқори ва минимум 2023 йил бошидан буён рекорд ойлик кўрсаткичдир (қўмитанинг статистик маълумотлари шу санадан бошлаб мавжуд). Жисмоний олиб келиш 3,5 баравар ошди.
Импортнинг кескин ўсиши 2 сентябрь куни Пискент автополигонида автотранспорт воситаларини синовдан ўтказишнинг бекор қилингани фонида рўй берди. Ҳажмларнинг ортгани импортнинг жисмоний ўсишини эмас, балки аввалги ойларда синовдан ўтишни кутиб турган автомобилларнинг рўйхатдан ўтказилганини акс эттириши мумкин.
Gazeta аввалроқ Ўзбекистон ва Хитойнинг автомобиль импорти ва экспорти бўйича статистик маълумотларидаги тафовутларга эътибор қаратган эди. Таҳририят сўровига жавобан Божхона қўмитасининг матбуот хизмати март ойида таъкидлашича, тафовут ҳақиқатда республикага олиб кирилган, лекин «импорт» сифатида рўйхатдан ўтмаган автотранспорт воситалари туфайли юзага келган бўлиши мумкин.
Шу тариқа, автомобиллар божхона омборларида сақланган, уларнинг эгалари автосинов майдончасида ўз навбатини ва автомобили мамлакат ҳудудида эркин ҳаракатланиши учун рухсат олишни кутиб турган.
Атиги тўққиз ой ичида электромобиллар импорти 473 миллион долларни ташкил этди, бу ўтган йилнинг январь-сентябрь ойларидаги кўрсаткичдан (182,1 миллион доллар) 2,6 баробар кўп.
Импорт қилинган электромобилнинг ўртача нархи 11 239 доллардан 11 724 долларга (+4,3%) ошди, гарчи 2024 йилнинг айрим ойларида ўртача нарх 4500 долларгача пасайган бўлса ҳам (баъзи Хитой моделлари 4000−6000 доллар туради).
ИЁДли автомобиллар ва гибридлар
Саккиз ойлик пасайишдан сўнг, бу йил бензинда ишлайдиган автомобиллар импорти ҳам миқдори ва қиймати бўйича ўсишни бошлади, бу ҳам Пискент полигонида синовларнинг тўхтатилиши оқибати бўлиши мумкин.
Хусусан, сентябрь ойида 43,58 миллион долларга 2394 та автомобиль олиб келинди. Ўсиш — мос равишда 45,3% ва 27%.
Тўққиз ой давомида 276,7 миллион долларга 13560 дона автомобиль олиб кирилди. Бу кўрсаткичлар ўтган йилга нисбатан икки баравар камайди.
Шу билан бирга, гибрид автомобиллар импорти пастлигича қолмоқда: январдан сентябргача 2264 дона «гибрид» 55,1 миллион долларга импорт қилинган. Таққослаш учун, 2024 йилнинг 9 ойида 223,6 миллион долларга 11 400 та шундай автомобиль (беш баробар кўп) етказиб берилган.