Венгриялик ёзувчи Ласло Краснахоркаи «қиёмат даҳшати шароитида санъатнинг кучини яна бир бор тасдиқлаган ишончли ва башоратли ижоди учун» 2025 йилда адабиёт бўйича Нобель мукофоти совриндори бўлди.
«Краснахоркаи Ласло — Кафка ва Томас Бернхардга бориб тақаладиган Марказий Европа анъаналарига мансуб буюк эпик ёзувчи», — дея таъкидлади Нобель қўмитаси.
2024 йилда адабиёт бўйича Нобель мукофоти жанубий кореялик ёзувчи Хан Ганга «тарихий жароҳатларга қарши чиққан ва инсон ҳаётининг нозиклигини очиб берган бой шеърий насри учун» берилганди.
«Нобель ҳафталиги» анъанавий равишда физиология ва тиббиёт бўйича мукофот совриндорларини эълон қилиш билан бошланди. 2025 йилда физиология ва тиббиёт бўйича мукофот Мэри Брункоу, Фред Рамсделл ва Шимон Сакагучига берилди. Улар «периферик иммунологик толерантлик бўйича кашфиётлар учун» тақдирланди.
7 октябрь куни физика бўйича Нобель мукофоти АҚШ олимлари Жон Кларк, Мишель Деворе ва Жон Мартинисга «электр занжирида макроскопик квант-механик туннеллашни ва энергияни квантлашни кашф этгани учун» берилди.
8 октябрь куни кимё бўйича Нобель мукофоти 2025 йилда Сусуму Китагава (Япония), Ричард Робсон (Австралия) ва Омар Яги (АҚШ)га «металлорганик каркас тузилмаларини ишлаб чиққани учун» берилди.
Тинчлик мукофоти лауреати 10 октябрь куни эълон қилинади. 1969 йилда Швеция Банки томонидан таъсис этилган, Алфред Нобель хотирасига бағишланган иқтисодий фанлар бўйича мукофот 13 октябрь куни топширилади. Лауреатларни тақдирлаш маросими 10 декабрь куни Стокгольмда (Швеция) бўлиб ўтади.
