Футбол бўйича Ўзбекистон миллий терма жамоаси ўртоқлик учрашувида Кувайтни 2:0 ҳисобида мағлуб этди. Учрашув 9 октябрь куни Тошкентдаги «Олимпия» стадионида бўлиб ўтди ва жамоанинг янги бош мураббий Фабио Каннаваро бошқарувидаги илк учрашуви бўлди.
Ўзбекистон ҳисобни тез очди: 10-дақиқада ҳужумчи Элдор Шомуродов дарвозабон билан бирга-бир вазиятга чиқди ва узоқ бурчакка аниқ зарба йўллади. Орадан тўққиз дақиқа ўтиб, Ҳожимат Эркинов мезбонлар устунлигини иккитага етказди — у қарши ҳужумни дарвозанинг чап бурчагига йўллаган зарбаси билан якунлади.
Иккинчи бўлимда ўзбекистонликлар ҳисобни янада йириклаштириши мумкин эди: 63-дақиқада Отабек Шукуров пенальтидан фойдалана олмади.
21-дақиқада Аббосбек Файзуллаев жароҳат олиб, майдонни тарк этди.
Эслатиб ўтамиз, жамоалар охирги марта 2012 йилда тўқнаш келган. Ўшанда Ўзбекистон «Пахтакор» стадионида ўтказилган ўртоқлик учрашувида Кувайтни 3:0 ҳисобида мағлуб этганди. Жамоалар бунгача олтита ўйин ўтказган: Ўзбекистон ҳисобида учта ғалаба, бир дуранг ва икки мағлубият.
ФИФА рейтингида Ўзбекистон 54, Қувайт 135-ўринни эгаллаб турибди.
Фабио Каннаваро 6 октябрь куни Ўзбекистон миллий терма жамоаси билан «2+3» шаклида — яна уч йилга узайтириш имконияти билан икки йиллик шартнома имзолади. Футбол ассоциацияси матбуот анжумани ўтказиб, журналистларнинг италиялик мураббийнинг Тимур Кападзе ўрнига тайинланиши борасидаги саволларига жавоб берди.
Таркиблар
Видео
Фото
