Белгия полицияси Антверпенда бош вазир Барт де Вевер ва бошқа баъзи сиёсатчиларга суиқасд уюштиришга тайёргарлик кўришда гумон қилинаётган уч кишини қўлга олди. Бу ҳақда Het Laatste Nieuws (HLM) портали ҳуқуқ-тартибот идораларига асосланиб хабар берди.
«Гумонланувчилар портловчи қурилмалар ўрнатилган дрон воситасида теракт содир этишни режалаштирган. Уч нафар гумонланувчи қўлга олиниб, улардан бири қўйиб юборилди», — дейилади хабарда.
Аниқлик киритилишича, учинчи гумонланувчи унга қарши далиллар «ҳибсда ушлаб туриш учун етарли эмаслиги» сабабли қўйиб юборилган.
Барт де Вевер Антверпен мэри лавозимида ишлаганида ҳам суиқасд нишонига айланган, ўшанда ҳам ҳужумнинг олди олинган эди.