8 октябр куни Бойсун тумани Бошработ маҳалласида жойлашган кўмир омборида кўмир тарқатиш вақти бир-бири билан талашиб, жанжаллашган бойсунликлар видеолари тарқалди.
Видеодаги талатўпга кўмир вақтида етказиб берилмагани сабаб бўлган, дейилади Kun.uz хабарида.
Бойсун тумани ҳокимлиги ҳолатга муносабат билдириб, кўмир тарқатиш графигига риоя қилмаган айрим фуқароларнинг навбатсиз кўмир олишга уриниши оқибатида тартибсизлик келиб чиққанини таъкидлади.
«Омборга аҳолига куз-қиш мавсуми учун тарқатиш мақсадида 278 тонна кўмир келтирилган. Давлат томонидан арзон нархларда тарқатилаётган кўмир ҳақидаги эълонлар тумандаги маҳаллалар Telegram гуруҳларига жойланган», — дейилади ҳокимлик берган муносабатда.
Тартибсизлик шу куни ички ишлар органлари ходимлари ёрдамида бартараф этилган. Кўмир тарқатиш жараёни белгиланган тартибда йўлга қўйилган. Бундан кейин кўмир қатъий белгиланган график асосида, ҳуқуқни муҳофаза қилувчи органлар ходимларини жалб этган ҳолда, тартиб билан тарқатилиши белгиланган.
Бойсун туман ҳокимлигининг туман ИИБ маълумотига таяниб Gazeta’га маълум қилишича, кўмир олишда бир-бирини белкурак билан калтаклаган фуқаролар видеоси бир йил аввалги ҳолат бўлиб, уларга нисбатан чора кўрилган. Қандай чора кўрилгани эса номаълум.
Бироқ ҳар иккала видео ҳам бир вақтда тасвирга олинганига кўмир ташиш учун келган юк машиналарининг бир хил навбатда тургани билан таққослаб, ишониш мумкин.
Биринчи видеодан кадр
Иккинчи видеодан кадр
Фото: Ижтимоий тармоқлар
Бойсунда куз-қиш мавсумида 39 та маҳалланинг 30 тасига кўмир тарқатилади, қолган маҳаллалар табиий ва суюлтирилган газ билан таъминланган. 2025−2026 йиллар мавсуми давомида Бойсун туманига жами 3036 тонна кўмир келтириш режалаштирилган. Ҳозирга қадар 1325 тонна кўмир аҳолига етказилган.
Тармоқларда тарқалган видеолар остида фойдаланувчилар тартибсизликка одамлар эмас, кўмирнинг вақтида етказилмагани ва унинг қишда етмай қолиши сабаб эканлигини ёзиб қолдирган.
Бойсунда ҳозир Ангрен кўмири эркин нахда 309 сўмдан сотилади. Туманнинг ўзида ҳам бир неча кўмир конлари бор.
«Бу ердан қазиб олинаётган кўмирни ёқиб бўлмайди, соғлик учун зарарли, калорияси кучлилиги сабаб печкани ҳам эритиб юборади. Шунинг учун қайта ишланади, худди Ангрен ва Навоий кўмири каби» — дейди ҳокимлик матбуот хизмати раҳбари Юнус Холиёров.