Франция президенти Эммануэль Макрон собиқ мудофаа вазири ва бош вазир Себастьен Лекорнюни мамлакат бош вазири этиб қайта тайинлади. 6 октябрь куни Лекорню бош вазир лавозимидан истеъфога чиққанди. У бундан бир ойдан камроқ вақт олдин — 2025 йил 9 сентябрда иш бошлаган ва бу лавозимда атиги 27 кун ишлаган.

Лекорнюнинг ўзи Х ижтимоий тармоғида президент томонидан унга топширилган миссияни «бурч ҳисси туфайли» қабул қилаётганини ёзди. У «Францияни йил охиригача бюджет билан таъминлаш ва ватандошларнинг кундалик ҳаётидаги муаммоларига жавоб бериш учун қўлидан келган барча ишни қилишга» ваъда берди.

«Французларни ғазаблантираётган бу сиёсий инқирозга, Франция имижига ва унинг манфаатларига зарар етказаётган бу беқарорликка чек қўйиш керак», — деб таъкидлади у.

«Давлат молиясини тиклаш келажагимиз ва суверенитетимиз учун устувор вазифа бўлиб қолади: бу заруратдан ҳеч ким қочиб қутула олмайди. Барча амбициялар қонуний ва фойдали, аммо ҳукуматга кирганлар 2027 йилгача президентлик амбицияларини четга суриб қўйиш мажбуриятини олиши керак. Янги ҳукумат жамоаси янгиланиш ва кўникмалар хилма-хиллигини ўзида мужассам этиши керак. Ушбу миссияда муваффақият қозониш учун ҳамма нарсани қиламан», — деди бош вазир.

Лекорню янги ҳукуматни шакллантириши, сўнгра 2026 йил учун бюджетни тасдиқлаш учун тақдим этиши керак бўлади, бундай лойиҳа ўзидан олдинги президент Франсуа Байру истеъфосининг асосий сабабларидан бирига айланганди. Сентябрь ойида парламент Байруга келгуси йиллар учун бюджет режаси бўйича келишмовчиликлар туфайли ишончсизлик вотуми эълон қилган.

Ўта ўнг ва сўл кучларнинг Лекорнюнинг тайинланишига муносабати жуда танқидий бўлди.

«Елисей саройида ҳар қачонгидан ҳам яккаланиб, воқеалардан узилиб қолган Эммануэль Макрон томонидан тайинланган Лекорню II ҳукумати француз халқи учун бемаъни ҳазил, демократияга иснод ва халққа нисбатан ҳақоратдир», — дея Х ижтимоий тармоғида ёзди «Миллий бирлашув» партияси етакчиси Жордан Барделла.

Лекорню сўнгги икки йил ичидаги Франциянинг бешинчи бош вазири бўлганди.

  • Франциядаги сиёсий инқироз 2024 йил июль ойида Макрон Миллий ассамблеяни тарқатиб юборган ва муддатидан олдин парламент сайловларини тайинлаганидан бери давом этмоқда. Бунга аввалроқ бўлиб ўтган Европарламент сайловларида ўта ўнгчи «Миллий бирлашув» (RN) ғалаба қозонгани сабаб бўлган. Овоз беришнинг икки босқичи (2024 йил 30 июнь ва 7 июль) натижаларига кўра, Франция парламентида 180 ўринга эга бўлган «Янги халқ фронти» (NFP) сўл партиялар коалицияси биринчи ўринни эгаллаган. Иккинчи ўриндан Макроннинг марказчи «Биргаликда» коалицияси 159 ўрин билан жой олган. Марин Ле Пен бошчилигидаги RN партияси учинчи ўринда қайд этилган, аммо парламентдаги иштирокини 142 ўрингача кенгайтира олганди.