UzAuto Motors Damas ва Cobalt’нинг янги версияларини ишлаб чиқарилишини эълон қилди. Унга кўра, Damas минивенининг Damas Move йўловчи версияси ва Damas Max юк-йўловчи версияси мавжуд бўлади. Cobalt’нинг эса Cobalt Style МCМ ва Cobalt Midnight MCM версиялари тақдим этилади.
Шавкат Мирзиёевнинг 2025 йил май ойида Хоразм вилоятига ташрифи давомида «Хоразм Авто» корхонасида 100 млн доллар ҳисобига бозорда катта талабга эга арзон автомобиль ишлаб чиқариши айтилганди.
Компаниянинг қайд этишича, янги Damas ўлчамлари катталашади, юк кўтариш қобилияти ва сиғими ошади, шунингдек, ҳайдовчи ҳамда йўловчилар қулайлиги яхшиланади. Янги модель айни пайтдаги жорий Damas версияси билан бир вақтда ишлаб чиқарилади.
«Бу эса харидорларга синовдан ўтган классик модель ҳамда замонавий технологик янгиликларга эга янги авлод автомобили ўртасида эркин танлов қилиш имконини яратади», — дейди компания.
UzAuto Motors Cobalt’нинг янгиланган версиясида илгари мавжуд бўлмаган 12 та янги опция билан жиҳозланишини маълум қилди. Қайд этилишича, модернизация жараёнида автомобилнинг двигатели янгиланган, ABS тизими такомиллаштирилган, шунингдек, двигатель ва унинг тизимларини бошқарувчи янги блок ўрнатилган.
Фото: UzAuto Motors
Фото: UzAuto Motors
Бундан ташқари, мижозлар учун Android Auto ва Apple CаrPlay‘ни қўллаб-қувватлайдиган сенсорли мультимедиа тизими, круиз-контроль тизими, эко-чармдан қилинган ўриндиқлар, олд ўриндиқларнинг иситиш функцияси, янги асбоблар панели ҳамда мультимедиа ва круиз-контролни бошқариш тугмалари билан жиҳозланган руль, шунингдек, интерьернинг янги декоратив элементлари каби бир қанча янги опциялар мавжуд бўлади. Жами 50 дан ортиқ асосий автомобиль компонентлари янгиланди.
«Cobalt моделини ривожлантиришнинг кейинги босқичи эса автомобилнинг ташқи кўринишини (фейслифт) ўзгартириш бўлиб, UzAuto Motors мутахассислари бу йўналишда ишларни аллақачон бошлашган», — дейди компания.
Автомобилларнинг нархлари ҳамда сотув бошланиши саналари бўйича батафсил маълумот кейинчалик эълон қилинади.