Душанба куни ижтимоий тармоқларда бир нечта бошланғич синф ўқувчилари синфдош қизни ҳақорат қилаётгани акс этган ролик пайдо бўлди.
Сергели туманидаги 300-мактабнинг 4-синфида ўқиётган қизнинг онаси экани тахмин қилинаётган аёлнинг айтишича, беш бола қизини ўраб олиб, қўйиб юбормай, мактабнинг тўртинчи қаватидан биринчи қаватигача қувган.
Унинг сўзларига кўра, бир бола қизнинг елкасига, иккинчиси сумкасига тепган, улардан бири унинг юзига тепмоқчи бўлган, бироқ уддасидан чиқмаган. Видео сўнггида бола қизнинг кўкрагига тепган, жабрланувчи оғриқдан йиқилиб қолган.
Онанинг айтишича, директор на болаларга, на ўқитувчига нисбатан чора кўрган. У мактаб маъмуриятининг муносабатини «совуқ» деб таърифлаган, айтишича, болалар бошқаларга катта бўлишгач, қизнинг оиласини ўлдиришлари ҳақида гапирган.
Аёл, шунингдек, безорилар директорнинг уларни ҳайдаб юборишга ваъда берганига қарамай, икки ҳафтадан кейин мактабга боришда давом этганини қайд этмоқда. У қизининг хавфсизлигидан хавотир билдирмоқда.
ММТБ муносабати
Тошкент шаҳри мактабгача ва мактаб таълими бошқармаси ўз муносабатида ҳолат 20 сентябрь куни дарсдан сўнг содир бўлганини ва ишчи гуруҳ томонидан текширилганини маълум қилди.
Таъкидланишича, мактаб маъмурияти воқеа юзасидан профилактика инспектори ва мактабга бириктирилган инспектор-психологларга хабар берган.
Текширув натижаларига кўра, икки нафар ўқувчининг ота-онаси Маъмурий жавобгарлик тўғрисидаги кодекснинг 47-моддаси (Болаларни тарбиялаш ва уларга таълим бериш борасидаги мажбуриятларни бажармаслик) билан маъмурий жавобгарликка тортилган. Бу БҲМнинг 1 дан 5 бараваригача жарима солишга сабаб бўлади.
«Шунингдек, бу каби ҳолатларга қайта йўл қўймаслик мақсадида ота-оналар билан йиғилиш ўтказилиб, тушунтириш ишлари олиб борилди ҳамда мактаб директори ва масъулларга интизомий чора кўрилди», — дейилади таълим бошқармаси хабарида.
Йиғилиш қачон ўтказилгани, ота-оналар ва мактаб ходимлари қачон жавобгарликка тортилгани айтилмаган. Ташкилот, шунингдек, онанинг ҳужумда беш бола иштирок этгани ва қизининг хавфсизлигидан хавотирланаётгани ҳақидаги баёнотига изоҳ бермади.