Жиноят ишлари бўйича Самарқанд шаҳар судида икки ака-укага нисбатан суд иши кўриб чиқилди. Ака-ука судланувчилар ўз укасини калтаклаб ўлдириб қўйган. Бу ҳақда «Севимли» телеканалининг «Замон» дастурида хабар берилди.
Воқеа шу йилнинг 20 июнь куни Самарқанд шаҳрида содир бўлган. 29 ёшли эркак интернетда қимор ва таваккалчиликка асосланган ўйинларга берилиб кетган. Бир ҳовлида яшовчи ака укасининг кредит қарзларини тўламаётганидан хавотирга тушган. Бу ҳолатни тўхтатиш учун у билан гаплашмоқчи бўлган. Суҳбатга кенжа укасини ҳам чақирган.
Уни дарахтга боғлаб қўйиб, баданига электр кабель симлари билан кўплаб тан жароҳати етказишган. Сўнг уни уйига олиб кириб ётқизиб қўйишган. Калтаклар зарбидан олган оғир тан жароҳатлари оқибатида орадан бир неча вақт ўтиб, ука вафот этган.
Марҳумнинг турмуш ўртоғи айтишича, эри кредит олган, лекин уни ўзи тўлаётган эди. Яқинда кредит учун 7 миллион тўлаб уни деярли тўлиқ ёпган. Турмуш ўртоғи билан бир йилу саккиз ой яшаган. У пайвандчи бўлган.
«Битта фарзандимиз бор, қизча. Турмуш ўртоғим қимор ўйнагани билан ҳеч кимга озор бермасди. Ака-укалари билан ҳам яхши чиқишарди. Бундай ваҳшийликка қўл уришганига ҳали ҳам ишонолмайман», — деди аёл.
Суд ҳужжатига кўра, марҳумнинг акаси судда берган кўрсатмасида ўртанча укаси айрим фуқаролардан қарз бўлиб қолгани, онлайн қимор уйинлари ўйнаб, барча топган пулларини тикиб юборгани, уйдаги кўп нарсаларни, турмуш ўртоғи ва онасига тегишли бўлган тилла тақинчоқларни ҳам сотиб, уларнинг пулларини ҳам онлайн қимор ўйинларига тикиб юборганини айтган.
«Ўртанчи ўғлимнинг иши яхши эди, у пайвандлаш ишларини амалга оширарди. 3−4 йилдан буён онлайн қимор ўйинларига берилиб, қарз бўлиб, уйларидаги тилла тақинчоқларни сотганди. Бундай ўйинларни ўйнамаслиги ҳақида бир неча маротаба тайинлаб, танбеҳ берган бўлишимга қарамасдан у гапимга кирмади, ишлаган барча пулларини шу онлайн қимор ўйинларига тикиб, уйга бирор маротаба пул олиб келмади. Акаси ва укаси ҳам бир неча маротаба онлайн қимор ўйнамаслиги, охири барибир қарз бўлиб қолишини айтишсада улар билан жанжал қилиб, ишларига аралашмаслигини айтди. Одамлардан қарзи кўпайиб кетганидан одамлар уйига қарзларини беришини сўраб келаверди. Шундан сўнг ака-укаси ҳам қарзларини тўлаб беришни бошлади. Лекин ўртанча ўғлим одамлардан ҳам, банкдан ҳам қарз олиб, онлайн қимор ўйинларига пул тикишдан қайтмади», — деди марҳумнинг отаси.
Воқеа юз берганида ака-укаларнинг ота-онаси Россияда бўлган. Улар судда ҳам жабрланувчи, ҳам даъвогар сифатида қатнашган.
Марҳумнинг акаси ва укаси Жиноят кодекси 138-моддаси иккинчи қисми «а» банди (Жисмоний азоб бериб, зўрлик ишлатиб ғайриқонуний равишда озодликдан маҳрум қилиш) ва 104-моддаси учинчи қисми «д» банди (Қасддан баданга оғир шикаст етказиб, жабрланувчининг ўлишига сабаб бўлиш) билан айбдор деб топилди. Акага 8 йил 6 ой, укага эса 6 йил 6 ой муддатга озодликдан маҳрум қилиш жазоси тайинланди.