Нью Йорк товар биржасида (CОМЕХ) олтин фьючерслари нархи ўз тарихий рекордини янгилаб, бир унция учун 4179 долларни ташкил қилди.
Олтин нархи йил бошидан буён 57 фоизга ўсди. Нархнинг рекорд даражада кўтарилиши Францияда юзага келган сиёсий инқироз фонида инвесторлар орасида олтинга бўлган талабнинг кучайиши, шунингдек, АҚШ президентининг Хитой билан савдо урушининг янги босқичини бошлаш ҳақидаги таҳдидлари билан изоҳланмоқда, деб ёзди Meduza.
Айни пайтда, Reuters нашрининг OANDA катта бозор таҳлилчиси Келвин Вонгдан иқтибос келтиришича, «бугунги нарх ўсишининг асосий сабаби савдодаги кескинлик эмас, балки Fed [АҚШ Федерал захира тизими — таҳр.] фоиз ставкаларини пасайтириш йўлида давом этиши мумкинлиги ҳақидаги кутилмаларнинг кучайишидир».
Федерал ҳукумат фаолиятида 13 кундан бери давом этаётган шатдаун мамлакат иқтисодиётига таъсир қила бошлади, дея таъкидлаган АҚШ молия вазири Скотт Бессент. АҚШда фоиз ставкаларини янада пасайтиришга меҳнат бозоридаги хавфларнинг ортиши асос бўлиши мумкин. Инвесторлар регуляторнинг пул-кредит сиёсати йўналиши ҳақида қўшимча маълумот олиш учун Федерал захира тизими раиси Жером Пауэллнинг сешанба куни бўлиб ўтадиган NABE (Бизнес иқтисодиёти миллий ассоциацияси) йиллик йиғилишидаги нутқини кутмоқда.
Банк of America олтин нархининг ўсиши фонида 2026 йил учун прогнозини янгилаб, келгуси йилда олтин нархи бир унция учун 5000 долларгача етиши мумкинлигини тахмин қилмоқда. Goldman Sachs ҳам ўз прогнозини қайта кўриб чиқди. Унга кўра, 2026 йил декабрга келиб олтин нархи бир унция учун 4900 долларгача кўтарилиши кутилмоқда.
Reuters`нинг ёзишича, АҚШ ва Хитой ўртасидаги савдо зиддиятларининг қайта кучайиши хавфсиз активларга, жумладан, кумушга бўлган талабни оширди ва у ҳам тарихий юқори чўққига чиқди — бир унция учун 53,60 доллар. Қимматбаҳо металлар нархининг ошишига геосиёсий ва иқтисодий ноаниқликлар, фоиз ставкаларининг пасайиши бўйича кутилмалар, марказий банклар харидларининг ортиши ва биржа фондларига барқарор маблағ оқимлари сабаб бўлгани айтилади.
