Россияда келгуси беш йилга — 2026−2030 йилларга мўлжалланган миграция сиёсати концепцияси тасдиқланди. Тегишли фармонни президент Владимир Путин имзолади, ҳужжат қонун ҳужжатларини расман эълон қилиш сайтига жойлаштирилган.
Концепцияда айтилишича, Россияга ишлаш учун келаётган муҳожирлар сонининг ўсиши 2030 йилгача сақланиб қолади. Бу чет эллик ишчиларга бўлган эҳтиёж билан боғлиқ. Бундан ташқари, миллий хавфсизликка янги чақириқлар ва таҳдидларнинг пайдо бўлиши миграция сиёсатини такомиллаштиришни талаб қилади. Россияда миграция сиёсати билан боғлиқ масалаларда иш берувчиларнинг масъулиятини оширишга қаратилган чоралар кўрилиши керак, дейилади концепцияда.
Ҳужжатда чет эл фуқароларининг кириши ва чиқишини тартибга солиш тажрибаси, уларнинг бўлиш шароитлари, миграция ҳисоби, вақтинчалик бошпана бериш ва фуқароликни олиш ҳисобга олинган.
Концепция 9 бўлим ва 46 банддан иборат. Мигрантларнинг анъанавий Россия қадриятларини баҳам кўришлари ва доимий яшаш жойларига кўчиб ўтишлари учун уларнинг интеграциясига алоҳида эътибор қаратилган, дейилади ҳужжатда.
Ноқонуний мигрантлар ва чет эл фуқаролари, жумладан, вояга етмаганлар ўртасидаги жиноятлар сонини камайтириш сиёсатнинг натижаси бўлиши керак.
Бундан ташқари, кутилаётган натижалар орасида қуйидагилар ҳам бор:
- Россияга кўчиб келаётган, анъанавий қадриятларга эга бўлган чет элликлар сони кўпайиши керак;
- Россияда мактабларга бормайдиган чет эллик болалар сони камайиши керак;
- Ҳукумат мигрантларнинг ишламайдиган ва ўқимайдиган оила аъзоларининг Россияда бўлишини чеклайди;
- Россия ҳукумати этник анклавларнинг шаклланиши ва мигрантларнинг маргиналлашувига қарши чоралар кўради;
- Россия миграция соҳасида давлат назорати учун ахборот технологиялари ва биометрияни кенг жорий этади.
Аввалроқ, 13 октябрь куни, Давлат думаси раиси Вячеслав Володин 2025 йил 5 февралдан бошлаб ноқонуний муҳожирлар реестри ишлай бошлаганидан бери миграция қонунчилигини бузган 35 мингга яқин киши Россиядан чиқариб юборилганини маълум қилганди.
Шу билан бирга, унинг аниқлик киритишича, Россия ҳудудида ноқонуний бўлиб турган муҳожирлар тўғрисидаги маълумотлар базасида (назорат остидаги шахслар реестри) 1 сентябрь ҳолатига кўра 770 минг киши рўйхатга олинган, уларнинг учдан бир қисми аёллар ва болалардир.
11 сентябрдан бошлаб ноқонуний мигрантларга никоҳ ва ажрашишларни рўйхатдан ўтказиш, болаларни боғча ва мактабларга жойлаштириш, гувоҳнома олиш, транспортни бошқариш ва ҳисоб рақамларини очиш тақиқланган.