Покистон ва Афғонистон 48 соат муддатга ўт очишни тўхтатишга келишиб олди. Сулҳ 15 октябрь, чоршанба куни маҳаллий вақт билан соат 18:00 да кучга кирди, деб ёзмоқда Reuters Покистон расмийлари баёнотига таяниб.
Томонлар «конструктив мулоқот орқали ушбу мураккаб, аммо ҳал қилинадиган масаланинг ижобий ечимини топиш учун самимий саъй-ҳаракатларни амалга оширади», — дейилади Покистон ТИВ баёнотида.
Ўтган дам олиш кунлари Афғонистон ва Покистон чегарасида қуролли тўқнашувлар содир бўлди, оқибатда ҳар икки томондан ўнлаб ҳарбий хизматчилар ҳалок бўлди. Кобул Исломободнинг Афғонистондаги нишонларга берган зарбаларига жавобан «қасос операцияси» ўтказганини маълум қилди. Покистон толибларнинг ҳужумларини «очиқланмаган» деб атади. Кейинроқ Саудия Арабистони ва Қатар чақириқларидан сўнг ҳарбий ҳаракатлар тўхтатилди.
Бироқ 15 октябрь куни икки давлат чегарасида жанговар тўқнашувлар қайта бошланди. «Толибон» Покистон томонидан Қандаҳорнинг Спинбулдак тумани ўққа тутилиши оқибатида ўн нафар тинч аҳоли ҳалок бўлгани ва 100 дан ортиқ киши жароҳатланганини маълум қилди. Исломобод зарбалар мақсади «Толибон» қўшинлари бўлганини айтди.
Покистон ва Афғонистон ўртасидаги муносабатлар кескинлашган, чунки Исломобод «Толибон»дан Покистонда ҳужумларни кучайтирган жангарилар бўйича чоралар кўришни талаб қилган. Покистон эса бу жангарилар Афғонистон ҳудудидаги бошпаналардан туриб фаолият юритмоқда, деб айтган.
«Толибон» бу айбловларни рад этиб, Покистонни мамлакат барқарорлиги ва суверенитетига путур етказиш мақсадида Афғонистон ҳақида ёлғон маълумот тарқатишда айбламоқда.
