АҚШ президенти Дональд Трамп Марказий разведка бошқармаси (МРБ)га Венесуэла ҳудудида махфий операциялар ўтказишга рухсат бергани ҳақидаги хабарларни тасдиқлади. У, шунингдек, Оқ уй наркокартелларга зарба бериш учун ушбу мамлакатда қуруқликдаги операцияларни ўтказиш имкониятини кўриб чиқаётганини айтди, деб хабар бермоқда Associated Press.
Сўнгги ҳафталарда АҚШ ҳарбийлари Кариб ҳавзасида гиёҳванд моддалар олиб кетаётгани тахмин қилинаётган кемаларга камида бешта зарба берди, оқибатда 27 киши ҳалок бўлди.
Трампнинг баёноти Венесуэла президенти Николас Мадурога босимни кучайтиришга уринаётган АҚШнинг кескин эскалациясидир, деб таъкидлайди Reuters.
Трамп нима учун Марказий разведка бошқармасига Венесуэлада операциялар ўтказишга рухсат бергани ҳақидаги саволга иккита сабаби борлигини айтди.
«Аслида мен икки сабабга кўра рухсат бергандим», — деб жавоб берди Трамп. — Биринчидан, улар ўз қамоқхоналарини бўшатиб, маҳбусларни Қўшма Штатларга жўнатишди… Улар чегарадан ўтиб келишган… Улар чегарадан чиққан. Иккинчиси — гиёҳванд моддалар. Бизга Венесуэладан кўплаб гиёҳванд моддалар келади ва Венесуэла гиёҳванд моддаларининг аксарияти денгиз орқали кириб келади», — деди у.
Трампнинг қўшимча қилишича, АҚШ денгиз орқали гиёҳванд моддаларни ушлаб қолишда муваффақиятга эришган ва энди қўшимча саъй-ҳаракатлар қуруқликдаги йўналишларга қаратилмоқда.
«Ҳозир қуруқликдаги йўналишларни кўриб чиқмоқдамиз, чунки денгиз бизнинг назоратимизда», — деди у.
Трамп МРБнинг Мадуро ҳокимиятини ағдаришга уринишлардаги эҳтимолий иштирокига изоҳ бермади, уни қўлга олиш учун АҚШ аввалроқ 50 млн доллар мукофот пули белгилаганди. — Бу саволга жавоб бериш бемаънилик эмасми? — деди у.
Мадуро Трампнинг баёнотига тўғридан-тўғри изоҳ бермаган ҳолда, бутун дунё бўйлаб турли можароларда МРБнинг ҳаракатларини танқид қилди.
Унинг айтишича, режимни алмаштиришга қаратилган ҳаракатлар — Афғонистон, Ироқ, Ливия каби давлатларда бўлган ва ҳали ҳам тугамаган урушлар ва беқарорликни эсга солмоқда.
Венесуэла Ташқи ишлар вазирлиги, шунингдек, «Қўшма Штатлар президентининг жанговар ва экстравагант баёнотларини» танқид қилди.
«Ушбу мисли кўрилмаган баёнот халқаро ҳуқуқ ва Бирлашган Миллатлар Ташкилоти низомини жуда жиддий бузиш бўлиб, мамлакатлар ҳамжамиятига бу очиқдан-очиқ меъёрсиз ва ақлга сиғмайдиган баёнотларни қоралаш мажбуриятини юклайди», — дейилади ташқи ишлар вазири Иван Хил ўз баёнотида.
Америка президенти бир неча бор Венесуэлани ўлимга олиб келадиган фентанил гиёҳвандлик воситасининг ноқонуний савдоси маркази деб атаган, аммо расмий маълумотларга кўра, АҚШда фентанилнинг асосий манбаи Мексикадир.
Октябрь ойи бошида Трамп маъмурияти наркокартелларни ноқонуний жангарилар деб эълон қилди ва Қўшма Штатлар улар билан «қуролли можаро» ҳолатида эканини айтди.
- 2025 йил август ойида АҚШ Давлат департаменти ва Адлия вазирлиги Венесуэла президенти Николас Мадуронинг ҳибсга олинишига олиб келадиган маълумот учун мукофотни 50 миллион долларгача оширганди. Вашингтон уни гиёҳванд моддалар картели етакчиси деб атайди ва АҚШда гиёҳванд моддалар савдосига кўмаклашишда айблайди. Мадуро бу айбловларни рад этмоқда.