Франция Миллий ассамблеяси (парламенти) Франция бош вазири Себастьен Лекорню ҳукуматига ишончсизлик вотуми эълон қилиш учун етарлича овоз тўплай олмади, деб ёзмоқда Reuters.

Биринчи ишончсизлик вотуми «Енгилмас Франция» радикал-сўл партияси ташаббуси билан ўтказилди ва 271 овоз олди. Иккинчи ишончсизлик вотуми таклифи Марин Ле Пен бошчилигидаги ўта ўнг «Миллий бирлашув» партияси томонидан илгари сурилди — у 144 овоз тўплади. Ҳукумат истеъфоси учун 289 та овоз керак эди.

Ишончсизлик вотумларига чап беришда Лекорнюга Франция президенти Эммануэль Макроннинг муҳим ислоҳотларидан бири — пенсия ёшини 62 ёшдан 64 ёшгача оширишни 2027 йилги президентлик сайловларигача тўхтатиб туриш ваъдаси ёрдам берди. Бу ён бериш унга социалистларни ўз томонига оғдиришга кўмаклашди, деб таъкидлайди Reuters.

Лекорню, шунингдек, вазирлар маҳкамасига парламентда овоз беришни четлаб ўтган ҳолда қонун лойиҳаларини тасдиқлаш имконини берувчи конституция моддасини қўлламасликка ваъда берди.

Агар Лекорню ишончсизлик вотумларидан бирида ютқазганида, у ва унинг вазирлари зудлик билан истеъфога чиқишига тўғри келарди, Макрон эса мухолифатнинг фавқулодда парламент сайловларини ўтказиш бўйича катта босими остида қоларди, бу эса Францияни янада инқирозга олиб келарди, деб ёзди Reuters.

Парламент Лекорню ҳукуматининг истеъфосини қўллаб-қувватламаганига қарамай, у 2026 йил учун бюджетни қабул қилиш бўйича қизғин музокараларга дуч келади, бу эса исталган вақтда навбатдаги ишончсизлик вотумига олиб келиши мумкин, дея таъкидлайди агентлик.

  • Себастьен Лекорню — Франциянинг собиқ мудофаа вазири — 9 сентябрь куни ҳукумат тепасига келганди ва 6 октябрь куни истеъфога чиқди. Бу Макрон тарафдорлари ҳам, мухолифат ҳам қоралаган янги ҳукумат таркиби эълон қилинганидан бир неча соат ўтиб содир бўлди. У бу лавозимда 27 кун ишлади — бу мамлакатнинг бутун янги тарихидаги энг қисқа бош вазирлик муддати. Бироқ 10 октябрь куни Франция президенти уни яна бош вазир лавозимига тайинлади.
  • Франциядаги сиёсий инқироз 2024 йил июль ойида Макрон Миллий ассамблеяни тарқатиб юборган ва муддатидан олдин парламент сайловларини тайинлаганидан бери давом этмоқда. Бунга аввалроқ бўлиб ўтган Европарламент сайловларида ўта ўнгчи «Миллий бирлашув» (RN) ғалаба қозонгани сабаб бўлган. Овоз беришнинг икки босқичи (2024 йил 30 июнь ва 7 июль) натижаларига кўра, Франция парламентида 180 ўринга эга бўлган «Янги халқ фронти» (NFP) сўл партиялар коалицияси биринчи ўринни эгаллаган. Иккинчи ўриндан Макроннинг марказчи «Биргаликда» коалицияси 159 ўрин билан жой олган. Марин Ле Пен бошчилигидаги RN партияси учинчи ўринда қайд этилган, аммо парламентдаги иштирокини 142 ўрингача кенгайтира олганди.